பீச்சுக்குச் செல்கிறீர்கள். ஜாலியாகச் சுற்றிவிட்டு கடலுக்குள் கொஞ்ச நேரம் காலை நனைத்தால் என்னவாகும்? கடல் அலை காலில் மோதும். பிறகு ஈரமணல் கால்களை அப்பியிருக்கும். ஆனால், மெல்போர்ன் பீச் அருகே கடலுக்குள் கால்களை நனைத்த சிறுவனுக்கு கிடைத்தது பகீர் அனுபவம்.
மெல்போர்னைச் சேர்ந்த சாம் கனிஸாய்க்கு வயது 16. கால்பந்து விளையாடி விட்டு வந்த சாமுக்கு கடலில் காலை நனைக்க ஆசை. அதே போல செய்தார். அரை மணி நேரம் கழித்து கரைக்குத் திரும்பினால் இரண்டு கால்களிலும் ரத்தம் பீறிட்டு கிளம்பியிருக்கிறது.
’வலிக்காமலா ரத்தம் வருது?’ என்று சாம் கால்களைப் பார்த்தபோது திடீரென்று வலி விண்ணென்று தெறித்திருக்கிறது. வீட்டுக்கு ஓடிய சாம், அப்பா ஜராடிடம் சொன்னார். அவர் மகனை மருத்துவமனையில் சேர்த்துவிட்டு, கடலுக்குள் மகனின் கால்களை கடித்தது எது என்று கண்டுபிடிக்கும் முயற்சியில் இறங்கினார்.
மகன் கடலில் இறங்கிய இடத்தில் கொஞ்சம் இறைச்சியை போட்டு, சிறு வலையை வீசினார். சிக்கியது சிறு சிறு பூச்சிகள். அதை அப்படியே வீடியோ எடுத்து மருத்துவமனைக்கு கொண்டு வந்துவிட்டார். அது என்ன பூச்சி என்று யாருக்கும் தெரியவில்லை. அந்த மர்மப் பூச்சி பற்றி ஆளாளுக்கு ஒன்று சொல்லிக் கொண்டிருக்கிறார்கள். ஆனாலும் எல்லாரும் சொல்வது, ‘இதுக்கு முன்னால இப்படியொரு பூச்சியை பார்த்ததே இல்லை’ என்பதை.