வறட்சியிலும், மழை வெள்ளத்திலும் அரசு சிறப்பாக பணியாற்றி வருவதாக முதலமைச்சர் எடப்பாடி பழனிசாமி தெரிவித்துள்ளார்.
நெல்லையில் தமிழக அரசு சார்பாக எம்ஜிஆர் நூற்றாண்டு விழா நடைபெற்று வருகிறது. இதில் முதலமைச்சர் எடப்பாடி பழனிச்சாமி, துணை முதலமைச்சர் ஓ.பன்னீர்செல்வம், மக்களவை துணை சபாநாயகர் தம்பிதுரை, அமைச்சர்கள், சட்டமன்ற மற்றும் நாடாளுமன்ற உறுப்பினர்கள் உள்ளிட்ட பலர் கலந்துகொண்டனர். இந்த விழாவின் போது பேசிய முதலமைச்சர் பழனிசாமி, தமிழகத்தில் ரூ.300 கோடி செலவில் குடிமராமத்துப் பணிகளை மேற்கொள்ள அரசு நடவடிக்கை எடுத்து வருவதாக கூறினார். தடுப்பணைகள் மூலம் சேமிக்கப்படும் தண்ணீர், விவசாயம் மற்றும் குடிநீர் தேவைக்காக பயன்படுத்தப்படும் என அவர் குறிப்பிட்டார்.
தொடர்ந்து பேசிய அவர், 3 ஆண்டுகளுக்குள் தமிழகத்தின் பல்வேறு ஆறுகளுக்கு இடையே தடுப்பணைகள் கட்டப்படும் என்றும், அதற்காக ரூ.350 கோடி நிதி ஒதுக்கீடு செய்துள்ளதாகவும் தெரிவித்தார். தமிழகத்தில் ஏற்பட்ட வறட்சியிலும், வெள்ளத்திலும் அரசு சிறப்பாக பணியாற்றி வருவதாகவும் அவர் குறிப்பிட்டார். ஆனால் அரசை குறை கூறுபவர்கள் குறை கூறிக்கொண்டே தான் இருப்பார்கள் என்றும், குறிப்பாக திமுக தனது இருப்பைக் காட்டிக் கொள்வதற்காக அரசைக் குறை கூறுவதாகவும் அவர் விமர்சித்தார்.