தமிழக பாஜகவின் புதிய தலைவரை தேர்வு செய்வதற்கான கருத்து கேட்பு கூட்டம் சென்னையில் இன்று நடைபெறுகிறது.
பாஜக மேலிட பொறுப்பாளர்கள் அக்கட்சியின் மாநில நிர்வாகிகளிடம் கருத்து கேட்கவுள்ளனர். பாஜக தேசியச் செயலாளர் ஹெச்.ராஜா, மாநில பொதுச் செயலாளர் வானதி சீனிவாசன், கருப்பு முருகானந்தம், துணைத் தலைவர் நயினார் நாகேந்திரன், மாநிலச் செயலாளர் கே.டி.ராகவன், A.P. முருகானந்தம் ஆகியோரில் ஒருவர் தலைவராகத் தேர்வு செய்யப்பட அதிக வாய்ப்புள்ளதாகக் கூறப்படுகிறது.
பாரதிய ஜனதா கட்சியின் தமிழக தலைவராக இருந்த தமிழிசை சவுந்தரராஜன் கடந்த செப்டம்பர் ஒன்றாம் தேதி தெலங்கானா ஆளுநராக நியமிக்கப்பட்டார். அதன் பின் கடந்த 4 மாதங்களாக அக்கட்சியின் தமிழகத் தலைவர் பதவிக்கு யாரும் தேர்வு செய்யப்படவில்லை. தலைவர் இல்லாமல் உள்ளாட்சித் தேர்தலையும் பாஜக சந்தித்தது. மாநில நிர்வாகிகளிடம் கருத்து கேட்கும் பாஜக மேலிடம், அக்கட்சியின் தமிழகத் தலைவர் குறித்த அறிவிப்பை விரைவில் வெளியிடும் என எதிர்பார்க்கப்படுகிறது.