செய்தியாளர்: செ.சுபாஷ்
சென்னையில் இருந்து தூத்துக்குடி செல்ல வேண்டிய விமானம் மோசமான வானிலை காரணமாக மதுரையில் தரையிறக்கப்பட்டது. விமானத்தில் இருந்த அமைச்சர் எ.வ.வேலு உட்பட 77 பயணிகள் பத்திரமாக இறக்கி விடப்பட்டு கார் மூலம் அனுப்பி வைக்கப்பட்டனர்.
இண்டிகோ விமானம் சென்னையில் இருந்து காலை 6 மணிக்கு புறப்பட்டு 7:35 மணிக்கு தூத்துக்குடி சென்றடையும். இந்த நிலையில் வழக்கம் போல் இன்றும் 6:26 மணியளவில் 77 பயணிகளுடன் சென்னையிலிருந்து புறப்பட்ட இண்டிகோ விமானம், தூத்துக்குடி விமான நிலையம் அருகே சென்றபோது மோசமான வானிலையை எதிர்கொண்டது. அதிக மேகமூட்டம் காரணமாக 20 நிமிடத்திற்கு மேலாக அருகில் உள்ள கடல் மேற்பகுதியில் சுற்றிக் கொண்டிருந்தது விமானம். இருப்பினும் வெகுநேரமாக வானிலை சரியாகாத காரணத்தால், விமானம் மதுரை விமான நிலையத்தில் தரையிறக்கப்பட்டது.
இந்த விமானத்தில் பொதுப்பணித்துறை அமைச்சர் எ.வ.வேலு பயணம் செய்த நிலையில் அவர் உட்பட 77 பயணிகளும் பத்திரமாக மதுரை விமான நிலையத்திலிருந்து கார் மூலம் புறப்பட்டனர்.
மோசமான வானிலை காரணமாக அமைச்சர் உட்பட 77 பயணிகளுடன் தூத்துக்குடி செல்ல வேண்டிய விமானம் திடீரென மதுரை விமான நிலையத்தில் தரையிறக்கப்பட்டது பரபரப்பை ஏற்படுத்தியது.