ஜெயலலிதா சிகிச்சை பெறுவது போல் வெளியாகி இருக்கும் வீடியோ மூலம் சசிகலா மற்றும் அவரின் குடும்பத்தார் மீது சுமத்தப்பட்ட புகார்களில் உண்மை இல்லை என்பது நிரூபணமாகியுள்ளதாக சட்டமன்ற உறுப்பினரும், நடிகருமான கருணாஸ் தெரிவித்துள்ளார்.
மறைந்த முதல்வர் ஜெயலலிதா மறைவிற்கு பிறகு, அவரின் மரணம் தொடர்பாக பல்வேறு அரசியல் கட்சிகள் பலதரப்பட்ட சந்தேகங்களை எழுப்பினர். மேலும் அவர் மருத்துவமனையில் சிகிச்சை பெற்ற புகைப்படத்தை ஏன் வெளியிடவில்லை? என்றும் கேள்வி எழுப்பினர். இந்நிலையில் இன்று, டிடிவி தினகரன் ஆதரவாளர் வெற்றிவேல், ஜெயலலிதா சிகிச்சை பெறுவது போல் வீடியோவை வெளியிட்டு இருப்பது அரசியல் களத்தில் பரபரப்பான சூழ்நிலையை ஏற்படுத்தியுள்ளது.
இந்நிலையில், இதுகுறித்து கருத்து தெரிவித்துள்ள அதிமுக எம்.எல்.ஏ. கருணாஸ், ஜெயலலிதா சிகிச்சை பெறுவதுபோல் வெளியாகி இருக்கும் வீடியோ நம்பகத் தன்மையுடன் இருப்பதாக அனைவரும் தெரிவிப்பதாக கூறினார். மேலும், ஜெயலலிதா மரணம் குறித்து சசிகலா மற்றும் அவர்களின் குடும்பத்தார்களின் மீது சுமத்தப்பட்ட புகார்கள் உண்மை இல்லை என்பதை இந்த வீடியோ மூலம் அனைத்து தரப்பினரால் ஏற்றுக்கொள்ளப்பட்டுள்ளதாகவும் தெரிவித்தார்.