திண்டுக்கல்லில் நேற்று பாதுகாப்பு பணியில் ஈடுபட்டிருந்த காவலருடன் ரவுடி ஒருவர் மோதும் வீடியோ வைரலாகி வருகிறது.
திண்டுக்கல் நகர் தெற்கு காவல் நிலையத்தில் காவலராகப் பணிபுரிந்து வருபவர் பாண்டி. இவர் நேற்று காலை பாரதிபுரத்தில் ரோந்து பணியில் ஈடுபட்டிருந்தார். டெப்போ சாலையில் ரோந்து வந்து கொண்டிருந்தபோது, அதே பகுதியைச் சேர்ந்த ரவுடி ராகவன்,அவனது நண்பன் ரெங்கன் ஆகியோர் போதையில் சத்தம் போட்டுக் கொண்டிருந்தனர். ராகவன் மீது கொலை மற்றும் வழிப்பறி எனப் பல வழக்குகள் நிலுவையில் உள்ளதால் இதைப் பார்த்த காவலர் பாண்டி அவர்களை அங்கிருந்து செல்லுமாறு தெரிவித்தார். ஆனால் ரவுடி ராகவன் மற்றும் அவரது நண்பன் ரெங்கன் ஆகியோர் பணியில் இருந்த காவலர் பாண்டியுடன் தகராறில் ஈடுபட்டனர்.
இதனையடுத்து சாலையில் கட்டிப்புரண்டு சண்டை போட்டனர். பின்னர் தகவலறிந்து தெற்கு காவல்நிலைய போலீசார் சம்பவ இடத்துக்கு விரைந்து வந்து பொதுமக்கள் உதவியுடன் ரவுடி ராகவனை கைது செய்தனர். மேலும் தப்பி ஓடிய அவனது கூட்டாளி ரெங்கனை போலீசார் தேடி வருகின்றனர். ரத்த காயம் அடைந்த காவலர் பாண்டி திண்டுக்கல் அரசு மருத்துவமனையில் சிகிச்சைக்காக அனுமதிக்கப்பட்டுள்ளார். பணியில் இருந்த காவலருடன் தகராறு செய்த ரவுடி ராகவன் மீது போலீசார் 4 பிரிவின் கீழ் வழக்குப்பதிவு செய்து விசாரணை நடத்தி வருகின்றனர். இந்நிலையில் காவலர்களுடன் ரவுடி கும்பல் ரகளையில் ஈடுபடும் வீடியோ காட்சி சமூக வலைத்தளங்களில் வைரலாக பரவி வருகிறது.