வேலூர் மாவட்டம் வாணியம்பாடியில் மதுபானக்கடையை மூட வலியுறுத்தி பொதுமக்கள் விடிய விடிய சாலை மறியல் போராட்டத்தில் ஈடுபட்டனர்.
வாணியம்பாடியில் வாரசந்தை மைதானத்தில், டாஸ்மாக் கடை செயல்பட்டு வருகிறது. இரவில் அந்தவழியாக சென்ற பெண்கள் மீது மதுபானம் தெளித்து சிலர் கேலி செய்துள்ளனர். அதனை கண்டித்து அந்த பகுதியைச் சேர்ந்த 300க்கும் அதிகமான பெண்களும், கட்சியினரும் சாலை மறியலில் ஈடுபட்டனர். சம்பவ இடத்திற்கு வந்த காவல்துறையினருடன் மக்கள் வாக்குவாதத்திலும் ஈடுபட்டனர். மதுபான கடையை உடனடியாக மூட வேண்டும் என்றும் மக்கள் வலியுறுத்தினர். அதிகாலை வரை நீடித்த பேச்சுவார்த்தையில் கடை மூட நடவடிக்கை எடுக்கப்படும் என காவல்துறையினர் உறுதியளித்ததை அடுத்து போராட்டம் கைவிடப்பட்டது.