செய்தியாளர்: மருதுபாண்டி
திருநெல்வேலி மாநகர் மேலப்பாளையம் பகுதியில் பிரபல திரையரங்கமான அலங்கார் திரையரங்கம் செயல்பட்டு வருகிறது, இந்த திரையரங்கத்தில் காலை கங்குவா திரைப்படமும் மாலை அமரன் திரைப்படமும் திரையிடப்பட்டு வருகிறது, இந்த நிலையில் அமரன் திரைப்படம் திரையிடப்படுவதற்கு எதிர்ப்பு தெரிவித்து கடந்த சில தினங்களுக்கு முன்பு இஸ்லாமிய அமைப்பைச் சேர்ந்த நூற்றுக்கும் மேற்பட்டோர் முற்றுகை போராட்டத்தில் ஈடுபட்டனர்,
இதனால் அந்த பகுதியில் சிறிது நேரம் பரபரப்பு ஏற்பட்டது, இந்த நிலையில் இன்று காலை திரையரங்கத்திற்கு வந்த மர்ம கும்பல், பாட்டிலில் பெட்ரோல் நிரப்பி பேனர் உள்ள இடம், டிக்கெட் கவுண்டர் மற்றும் நுழைவுப் பகுதி ஆகிய மூன்று இடங்களிலும் பெட்ரோல் குண்டை வீசி விட்டு சென்றுள்ளனர். இதையடுத்து அதிர்ச்சியடைந்த திரையரங்கத்தின் பாதுகாவலர்கள் காவல் துறையினருக்கு தகவல் கொடுத்துள்ளனர்,
தகவல் அறிந்து சம்பவ இடத்திற்கு வந்த மேலப்பாளையம் காவல்துறையினர் தடய அறிவியல் நிபுணர்கள் வரவழைக்கப்பட்டு தடயங்களை சேகரித்து மோப்பநாய் உதவியுடன் விசாரணை மேற்கொண்டு வருகிறார்கள். மேலும் திரையரங்கம் மற்றும் திரையரங்கத்தின் அருகே உள்ள சிசிடிவி காட்சிகளை கைபற்றி விசாரணை நடத்தி வருகிறார்கள். அமரன் படம் திரையிடுவதற்கு எதிர்ப்பு தெரிவித்து வந்த நிலையில், தற்போது இந்த திரையரங்கத்தில் பெட்ரோல் குண்டு வீசப்பட்ட சம்பவம் பெரும் பரபரப்பை ஏற்படுத்தியுள்ளது.