சாலை விபத்தில் மயக்கமடைந்த நபர் - முதலுதவி அளித்து காப்பாற்றிய அமைந்தகரை காவலர்கள்

அமைந்தகரை அருகே சாலை விபத்தில் காயமடைந்த நபரை அமைந்தகரை காவலர்கள் காப்பாற்றினர்.

சென்னை அமைந்தகரை புல்லா அவென்யூ பெண்கள் மேல்நிலைப் பள்ளி அருகில் நேற்று இரவு அமைந்தகரை காவல்நிலைய காவலர்கள் பிரேமா, சரவணன், சிவராமன், கோவிந்தன் ஆகியோர் மாஸ்க் அணியாமல் இருசக்கர வாகனத்தில் வரும் நபர்களை நிறுத்தி வழக்குப் பதிவு செய்து அபராதம் விதித்துக் கொண்டிருந்தனர்.

அப்போது டிபி சத்திரம் பகுதியைச் சேர்ந்த பாபு என்பவர் அங்கு உள்ள சாலையை கடந்துள்ளார். அப்போது அதிவேகமாக சென்ற அடையாளம் தெரியாத இருசக்கர வாகனத்தில் வந்த நபர் பாபு மீது மோதிவிட்டு அங்கிருந்து தப்பிச் சென்றார்.

இதனை பார்த்த காவலர்கள் உடனடியாக ஓடிச்சென்று மயக்க நிலையில் இருந்த பாபுவை மீட்டனர். ஆனால், பாபு மூச்சுப் பேச்சு இல்லாமல் மயக்க நிலையில் இருந்ததால் காவலர் ஒருவர் பாபுவின் மார்பில் கையை வைத்து அமுக்கி முதலுதவி அளித்து பாபுவை முழிக்க வைத்து காப்பாற்றினார்.