கிருஷ்ணகிரி மாணவிகள் பாலியல் வன்கொடுமை வழக்கு: கைதான சிவராமன் மரணம்; அவரது தந்தையும் உயிரிழப்பு!

செய்தியாளர்: பழனிவேல்

கிருஷ்ணகிரி மாவட்டத்திலுள்ள பிரபல தனியார் பள்ளி ஒன்றில் கடந்த 5ஆம் தேதி முதல் 9ஆம் தேதி வரை தேசிய மாணவர் படையின் பெயரில் போலியாக ஒரு என்சிசி முகாம் நடந்துள்ளது. இதை போலி என அறியாது, அந்தப் பள்ளியை சேர்ந்த 17 மாணவிகள் கலந்து கொண்டுள்ளனர்.

இந்த முகாமில் கலந்துகொண்ட 13 வயதுடைய மாணவி ஒருவரை போலி என்சிசி பயிற்சியாளரும் நாம் தமிழர் கட்சியின் கிருஷ்ணகிரி முன்னாள் கிழக்கு மாவட்ட இளைஞர் பாசறை மாவட்டச் செயலாளருமான சிவராமன் என்பவர் பாலியல் வன்கொடுமை செய்திருக்கிறார். இதுதொடர்பாக மாணவி புகார் அளித்த நிலையில், சிவராமன் கைது செய்யப்பட்டார்.

காவல்துறை விசாரணையில், ‘மேலும் 13 மாணவிகள் சிவராமனால் பாலியல் வன்கொடுமை செய்யப்பட்டிருக்கலாம்’ என்ற அதிர்ச்சி செய்தியும் வெளியாகி பரபரப்பை ஏற்படுத்தியது.

இதனால் சிவராமனால் பாதிக்கப்பட்டவர்கள் தாமாக முன்வந்து புகார் கொடுக்கவும் என காவல்துறை கேட்டுக்கொண்டது. அதன்பேரில் நேற்றைய தினம், சிவராமன் மீது மேலும் ஒரு மாணவி பாலியல் புகார் கொடுத்துள்ளார்.

இதற்கிடையே விசாரணை விரிவடைந்த நிலையில், சிவராமன் உட்பட 11 பேரை காவல்துறையினர் கைது செய்தனர். அதில், சிவராமன் போலீசாரிடமிருந்து தப்பிக்க முயற்சி செய்து ஓடியுள்ளார். இதில் அவர் பள்ளத்தில் குதித்ததில் அவரின் வலது காலில் எலும்பு முறிவு ஏற்பட்டது. இதைத்தொடர்ந்து சிகிச்சைக்காக கிருஷ்ணகிரி அரசு மருத்துவக் கல்லூரி மருத்துவமனையில் அனுமதிக்கப்பட்டு சிகிச்சை பெற்று வந்தார்.

இதன்பின்னர், அவர் தற்கொலைக்கு முயன்றதாக கூறப்படுகிறது. ஆகவே, அதற்கான சிகிச்சையும் அளிக்கப்பட்டு வந்துள்ளது. இந்நிலையில்தான், கடந்த இரண்டு நாட்களுக்கு முன் சேலம் அரசு மருத்துவக்கல்லூரி மருத்துவமனைக்கு மேல் சிகிச்சைக்காக அனுப்பிவைக்கப்பட்டார் சிவராமன்.

இதில் சிகிச்சைப் பலனின்றி இன்று (23.8.2024) காலை 5.30 மணி அளவில் சிவராமன் உயிரிழந்ததாக கிருஷ்ணகிரி காவல் கண்காளிப்பாளர் தெரிவித்துள்ளார்.

சிவராமன் இறந்த செய்தி வெளியான சிறிது நேரத்திலேயே, சிவராமன் தந்தையும் உயிரிழந்து விட்டதாக தற்போது தகவல் வெளியாகியுள்ளது.

காவிரிப்பட்டினம் பகுதியை சேர்ந்த, சிவராமனின் தந்தையான அசோக்குமார், நேற்று நள்ளிரவு மதுபோதையில் சென்று கொண்டிருந்தபோது, நிலைத்தடுமாறி கீழே விழுந்ததில் காயம் ஏற்பட்டு உயிரிழந்துள்ளார் என்ற தகவல் வெளியாகியுள்ளது.

சேலம் மருத்துவமனையில் இருக்கும் சிவராமனின் உடல் பிரேதப்பரிசோதனை செய்து முடிக்கப்பட்டப்பின்னர், அவரின் சடலமானது பெற்றோர்களிடத்தில் ஒப்படைக்கப்படும் என்று கூறப்பட்டிருந்தது. இந்நிலையில், தற்போது சிவராமனின் தந்தையும் உயிரிழந்திருப்பது பெரும் அதிர்ச்சியை ஏற்படுத்தியுள்ளது.

முன்னதாக, இது குறித்து விசாரணை செய்வதற்காக, சிறப்பு குழு அமைக்கப்பட்டிருந்தது. ஆனால், தற்போது முக்கிய குற்றவாளியே உயிரிழந்திருப்பது மிகப்பெரிய குழப்பத்தை ஏற்படுத்தியுள்ளது.