இந்தியாவின் அனைத்து மாநில முதலமைச்சர்களுக்கும் சுதந்திர தினத்தன்று கொடி ஏற்ற உரிமை பெற்றுத் தந்த மனிதருக்கு நன்றி எனக் குறிப்பிட்டுள்ளார் கனிமொழி.
இந்தியாவின் 75-வது சுதந்திர தினத்தையொட்டி சென்னை ஜார்ஜ் கோட்டை கொத்தளத்தில் இன்று தமிழக முதலமைச்சர் மு.க.ஸ்டாலின் தேசியக் கொடியேற்றினார். இவ்விழாவில் சபாநாயகர் அப்பாவு, அமைச்சர்கள், துர்கா ஸ்டாலின், உதயநிதி ஸ்டாலின், எம்.பி.க்கள், எம்.எல்.ஏ.க்கள் உள்ளிட்ட பலர் கலந்து கொண்டனர்.
முதல்வர் மு.க.ஸ்டாலின் சுதந்திர தின உரையாற்றுகையில், 'சுதந்திர தின நாளில் முதலமைச்சர்கள்தான் கொடியேற்ற வேண்டும் என்ற சுதந்திரத்தை வாங்கிக் கொடுத்தவர் கலைஞர் கருணாநிதி' என நினைவுகூர்ந்தார்.
இதையொட்டி, திமுக மகளிரணிச் செயலாளரும், தூத்துக்குடி நாடாளுமன்ற உறுப்பினருமான கனிமொழி, தனது ஃபேஸ்புக் பக்கத்தில் பதிவு ஒன்றை வெளியிட்டுள்ளார். அப்பதிவில், ''இந்தியாவின் அனைத்து மாநில முதலமைச்சர்களுக்கும் சுதந்திர தினத்தன்று கொடி ஏற்ற உரிமை பெற்றுத் தந்த மனிதருக்கு நன்றி'' என்று பதிவிட்டுள்ளார்.