தமிழக முதல்வர் முக.ஸ்டாலின் ரிப்பன் மாளிகையில் உள்ள கட்டுப்பாட்டு அறையில் ஆய்வு மேற்கொண்டார். அதன் பின் செய்தியாளர்களை சந்தித்த அவர் பேசிய போது...
“சென்னையில் மீட்புப் பணிகள் விரைவாக நடைபெற்று வருவதால் இயல்பு வாழ்க்கை வெகு விரைவில் திரும்பும். கடந்த 2015-ல் ஏற்பட்டது செயற்கை வெள்ளம். ஆனால், இம்முறை சென்னை எதிர்கொண்டது இயற்கை வெள்ளம். மழை நிற்பதற்கு முன்பே வெளி மாவட்ட பணியாளர்கள் வரவழைக்கப்பட்டதால் மீட்புப் பணிகள் விரைவாக தொடங்கியுள்ளன.
கடந்த 2015-ல் பெய்த மழையில் 119 பேர் உயிரிழந்த நிலையில், இம்முறை அதிக மழை பெய்தும் 7 பேர் மட்டுமே உயிரிழந்துள்ளனர்.
மழையால் பாதித்த 9 மாவட்டங்களில் 61 ஆயிரம் பேர் நிவாரண முகாம்களில் தங்க வைக்கப்பட்டுள்ளனர். அவர்களுக்கு 11 லட்சம் உணவு பாக்கெட் மற்றும் 1 லட்சம் பால் பாக்கெட்டுகள் வழங்கப்பட்டுள்ளன.
புயல், மழை பாதிப்புக்காக மத்திய அரசிடம் 5 ஆயிரம் கோடி நிவாரண உதவி கேட்கப்படும். மத்திய அரசு வழங்கும் நிதியை பொறுத்து நிவாரண உதவிகள் வழங்கப்படும். சென்னையில் கடந்த காலங்களை விட இம்முறை பாதிப்பு குறைவு. அரசின் முன்னெச்சரிக்கை நடவடிக்கைகளால் மழையால் பாதிப்பின் தாக்கம் குறைந்துள்ளது. 4 ஆயிரம் கோடிக்கு சென்னையில் மேற்கொள்ளப்பட்ட பணிகளால்தான் மழை பாதிப்பு குறைந்துள்ளது” என்றார்.
முன்னதாக முதல்வர் மக்கள் தங்கவைக்கப்பட்டுள்ள முகாம்களில் நேரில் ஆய்வுகொண்டதும் குறிப்பிடத்தக்கது.