பொன்னேரியில் வாலிபால் ஆடும்போது ஏற்பட்ட தகராறில் 2 பேர் கல்லால் அடித்துக் கொலை செய்யப்பட்ட சம்பவம் அதிர்ச்சியை ஏற்படுத்தியுள்ளது.
திருவள்ளூர் மாவட்டம் பொன்னேரி அடுத்த ஆலாடு பகுதியில் இளைஞர்கள் நேற்று வாலிபால் விளையாடிக் கொண்டிருந்தனர். அப்போது இரு தரப்பினருக்கிடையே வாய் தகராறு ஏற்பட்டதாக தெரிகிறது. இதனையடுத்து, தகராறு முற்றியதில் இரு தரப்பினரும் கைகலப்பில் ஈடுபட்டுள்ளனர்.
இதில் கல்லால் தாக்கிக் கொண்டபோது, பொன்னேரி வேண்பாக்கம் பள்ளம் பகுதியை சேர்ந்த சுதாகர் மற்றும் வீரா ஆகியோர் சம்பவ இடத்திலேயே பரிதாபமாக உயிரிழந்தனர்.
தகவலறிந்து சம்பவ இடத்திற்கு சென்ற போலீசார் இறந்தவர்களின் உடல்களை மீட்டு பிரேத பரிசோதனைக்காக மருத்துவமனைக்கு அனுப்பி வைத்தனர். மேலும் வழக்குப்பதிவு செய்து விசாரணை மேற்கொண்டு வருகின்றனர். இதுகுறித்து எஸ்பி அரவிந்தன் கூறும்போது, “கொலை செய்யப்பட்ட இருவரும் கடந்த 2018-இல் நடந்த கொலையில் தொடர்புடையவர்கள். கொலை செய்தவர்கள் குறித்து விசாரணை நடைபெற்று வருகிறது” எனத் தெரிவித்தார்.
2018-ஆம் ஆண்டு ஆலாடு பகுதியை சேர்ந்த அஜித் என்பவர் கொலை செய்யப்பட்ட சம்பவத்திற்கு பழிக்குப்பழியாக இந்த கொலை நடந்துள்ளதாக காவல் துறை வட்டாரங்கள் தெரிவிக்கின்றன.