உலகக்கோப்பை கால்பந்து தகுதிச் சுற்றில் வெல்லப்போவது யார்?

பெரு அணிக்கு எதிரான உலகக் கோப்பை கால்பந்து தகுதிச் சுற்றில் வெற்றி பெறுவோம் என அர்ஜென்டினா அணியின் பயிற்சியாளர் ஜார்ஜ் சாம்போலி நம்பிக்கை தெரிவித்துள்ளார். 

இரு அணிகள் இடையிலான உலகக் கோப்பை கால்பந்து தகுதிச் சுற்று போட்டி அர்ஜென்டினாவில் நாளை காலை நடைபெறவுள்ளது. ரஷ்யாவில் அடுத்த ஆண்டு நடைபெறவுள்ள உலகக்கோப்பை தொடருக்கு தகுதி பெற, நாளை நடைபெறவுள்ள போட்டியில் வெற்றி பெற வேண்டிய நெருக்கடி இரு அணிகளுக்கும் இருக்கிறது.

இந்நிலையில் தென்அமெரிக்க அணிகளுக்கான தகுதிச் சுற்றில் ஒவ்வொரு அணிக்கும் இன்னும் 2 போட்டிகள் மட்டுமே மீதமுள்ளன. தற்போது பெரு அணி நான்காவது இடத்திலும், அர்ஜென்டினா அணி ஐந்தாவது இடத்திலும் உள்ளன. முதல் நான்கு இடங்களைப் பிடிக்கும் அணிகள், ரஷ்யாவில் அடுத்த ஆண்டு நடைபெறவுள்ள உலகக்கோப்பை போட்டிக்கு நேரடியாகத் தகுதி பெறும் என எதிர்பார்க்கப்படுகிறது.