சர்வதேச ஒரு நாள் கிரிக்கெட்டில் இந்தியாவின் விராத் கோலி, தற்போது சிறந்த வீரராக இருக்கிறார் என்று ஆஸ்திரேலிய முன்னாள் கேப்டன் மைக்கேல் கிளார்க் கூறியுள்ளார்.
இந்தியா வந்துள்ள ஆஸ்திரேலிய கிரிக்கெட் அணியின் முன்னாள் கேப்டன் மைக்கேல் கிளார்க் கூறும்போது, ’ஒரு நாள் கிரிக்கெட்டில் விராத் கோலி சிறந்த பேட்ஸ்மேன். டெஸ்ட் கிரிக்கெட்டில் ஸ்மித் சிறப்பாக செயல்படுகிறார். கேப்டன்ஷிப்பை பொறுத்தவரை இருவரும் ஒரே மாதிரியான நிலையில்தான் இருக்கிறார்கள். இருவரும் சிறப்பான ஆட்டக்காரர்கள். ஒரு கேப்டனாக அணியை வெற்றி பெற வைப்பதே முக்கியம். தற்போதைக்கு, விராத் கோலியின் அணி வெற்றிகளை குவித்து வருகிறது. எனவே ஸ்மித் இந்த தொடரில் முதல் போட்டியிலேயே, தங்கள் அணியின் உத்வேகத்தை நிலை நிறுத்த வேண்டும்.
இந்திய மைதானம் சுழற்பந்துவீச்சுக்கு சாதகமாக இருக்கும். அஸ்வின், ஜடேஜா இல்லை என்றாலும் இந்திய அணியில் இளம் சுழற்பந்துவீச்சாளர்கள் வந்திருக்கிறார்கள். குல்தீப் யாதவ் சூப்பர் ஸ்டாராக திகழ்கிறார். ஆஸ்திரேலியா அணியின் ஜம்பாவும் அகாரும் சிறப்பாக செயல்படுவார்கள் என்று நம்புகிறேன். ஆஸ்திரேலிய வீரர்கள் இந்திய மண்ணில், ஐ.பி.எல். கிரிக்கெட்டில் விளையாடி இருப்பதால் அந்த அனுபவம், அவர்களுக்கு கை கொடுக்கும் என நினைக்கிறேன்’ என்றார்.