“திரும்பவும் முதல்ல இருந்து நடந்து வாங்க” - கோலிக்கு இன்ப அதிர்ச்சி கொடுத்த ரோகித்!

இலங்கை அணிக்கு எதிரான டெஸ்ட் போட்டியின் 2-ம் நாள் ஆட்டத்தில் இந்திய அணி கேப்டன் ரோகித் சர்மா, முன்னாள் கேப்டன் விராட் கோலியை கௌரப்படுத்திய விதம் ரசிகர்களை நெகிழ்ச்சியடைய செய்துள்ளது.

இந்தியாவில் சுற்றுப்பயணம் மேற்கொண்டுள்ள இலங்கை அணி, 0-3 எனற் கணக்கில் டி20 தொடரை இழந்தது. இதையடுத்து இரண்டு போட்டிகள் கொண்ட டெஸ்ட் தொடரின் இலங்கை அணி பங்கேற்கிறது. இதில் முதல் டெஸ்ட் போட்டியானது, நேற்று பஞ்சாப் மாநிலம் மொகாலியில் தொடங்கி நடைபெற்று வருகிறது.

விராட் கோலி விலகியப் பிறகு டெஸ்ட் கேப்டனாக ரோகித் சர்மா பங்கேற்கும் முதல் போட்டி இதுவாகும். மேலும், முன்னாள் கேப்டன் விராட் கோலிக்கு இந்த டெஸ்ட் போட்டி 100-வது போட்டியாகும். இதனால், பெரும் எதிர்பார்ப்பு நிலவியது. இந்தப் போட்டியில் டாஸ் வென்ற இந்திய அணியின் கேப்டன் ரோகித் சர்மா, பேட்டிங்கை தேர்வு செய்தார்.

இதையடுத்து முதல் இன்னிங்சை துவங்கிய இந்திய அணி, ஜடேஜா, ரிஷப் பந்த் அதிரடி ஆட்டத்தால், மளமளவென ரன்களை குவித்தது. அதன்படி, இரண்டாம் நாள் ஆட்டத்தில் இந்திய அணி 8 விக்கெட்டுகள் இழப்பிற்கு 574 ரன்களை எடுத்திருந்தபோது, முதல் இன்னிங்சை கேப்டன் ரோகித் சர்மா டிக்ளேர் செய்தார்.

இதையடுத்து பீல்டிங் செய்ய இந்திய அணி வீரர்கள் மைதானத்தை நோக்கி நடந்தனர். அப்போது, விராட் கோலியை கவுரவிக்க ரோகித் செய்த செயல் ஒன்று, தற்போது ரசிகர்கள் மத்தியில் மிகப்பெரிய அளவில் வைரலாகி வருகிறது. பீல்டிங் செய்ய, விராட் கோலி முன்கூட்டியே மைதானத்திற்குள் சென்றார்.

இதனைக்கண்ட ரோகித் சர்மா, அவரை அழைத்து மீண்டும் பெவிலியன் சென்றுவிட்டு திரும்பி வருமாறு கூறினார். இதற்கு ஏன் என விராட் கோலி கேள்வி எழுப்ப, ரோகித் சர்மா நீங்கள் போய் திரும்பி வாருங்கள் என்று கூறியபடி, அவரை மைதானத்திலிருந்து பெவிலியனுக்கு அனுப்பினார். பின்னர் பெவிலியனிலிருந்து விராட் கோலி திரும்பி வந்தபோது, அவருக்கு இந்திய அணியின் வீரர்கள் அனைவரும் இருபுறமும் நின்று கைதட்டி கௌரவ வரவேற்பினை (Guard of Honour) கொடுத்தனர்.

இந்த மரியாதையை சற்றும் எதிர்பாராத விராட் கோலி, மிகுந்த மகிழ்ச்சியுடன், ரசிகர்கள் மற்றும் வீரர்களின் கைதட்டல்களுக்கு மத்தியில் உள்ளே நுழைந்தார். சமீப காலங்களாகவே ரோகித் மற்றும் விராட் கோலி ஆகியோருக்கு இடையே மோதல் உள்ளது என்றும், அவர்கள் இடையே பிரச்சனை என்றும் செய்திகள் வெளிவந்த நிலையில், கேப்டன் ரோகித் சர்மா, விராட் கோலியை கௌரவித்தது அவர்களிடையே உள்ள நட்பை காட்டியுள்ளது. 

ரோகித் சர்மாவின் இந்த செயல், தற்போது வைரலாகி வருகிறது. 100-வது டெஸ்ட் போட்டியில் விளையாடி வரும் விராட் கோலிக்கு, ஏற்கனவே போட்டியின் முதல் நாள் அன்றே இந்திய அணியின் சார்பில் பல பரிசுகள், கௌரவங்கள் வழங்கப்பட்டது. இரண்டாம் நாள் ஆட்ட நேர முடிவில், முதல் இன்னிங்சை விளையாடி வரும் இலங்கை அணி, 4 விக்கெட்டுகளை இழந்து 108 ரன்கள் குவித்து 466 ரன்கள் பின்தங்கியுள்ளது குறிப்பிடத்தக்கது.