ரஷ்யாவை சேர்ந்த பிரபல டென்னிஸ் வீராங்கனை மரியா ஷரபோவா சர்வதேச போட்டிகளில் இருந்து ஓய்வு பெறுவதாக அறிவித்துள்ளார்.
32 வயதான ஷரபோவா 5 முறை கிராண்ட் ஸ்லாம் பட்டம் வென்றுள்ளார். முன்னாள் முதல் நிலை வீராங்கனையான அவர், இறுதியாக கடந்த ஜனவரியில் ஆஸ்திரேலிய ஓபனில் பங்கேற்றார். ஊக்கமருந்து பயன்படுத்தியதாக 2016-ஆம் ஆண்டில், ஷரபோவாவுக்கு 15 மாதங்கள் தடைவிதிக்கப்பட்டது.
தண்டனைக் காலம் முடிந்து மீண்டும் டென்னிஸ் களத்திற்கு திரும்பிய அவரால் பெரிதாக ஜொலிக்க முடியவில்லை. இந்த நிலையில் தனது ஓய்வு முடிவை ஷரபோவா அறிவித்துள்ளார். 2004-ம் ஆண்டு செரீனா வில்லியம்சை நேர் செட்டில் தோற்கடித்து விம்பிள்டன் பட்டம் வென்றார் மரியா ஷரபோவா. அப்போது அவருக்கு வயது 17.
டென்னிஸ் உலகை உற்றுநோக்க வைத்த மரியா, 2006-ம் ஆண்டு அமெரிக்க ஓபனிலும், 2008-ல் ஆஸ்திரேலிய ஓபனிலும், 2012 மற்றும் 2014-ம் ஆண்டுகளில் பிரெஞ்ச் ஓபனிலும் பட்டம் வென்றார். இந்நிலையில் தற்போது ஓய்வு முடிவை ஷரபோவா அறிவித்துள்ளார்.