ஹர்திக் பாண்டியாவும், மணிஷ் பாண்டேவும் இந்திய அணியில் சேவாக், ஹர்பஜன் சிங் இடத்தை பிடிப்பார்கள் என இந்திய கிரிக்கெட் அணியின் முன்னாள் கேப்டன் சவுரவ் கங்குலி தெரிவித்துள்ளார்.
கோவையில் நடைபெற்ற ‘வாக்’கத்தான் நிகழ்ச்சிக்குப் பிறகு இந்திய அணியின் தற்போதைய நிலை குறித்து செய்தியாளர்களிடம் பேசிய கங்குலி, “டி20 போட்டி கிரிக்கெட்டிற்கு தேவை. அது இல்லாமல் இன்றைய காலகட்டத்தில் கிரிக்கெட் என்பது சாத்தியமற்றது. தென்னாப்பிரிக்காவுக்கு எதிரான ஒருநாள் தொடரில் நமது வீரர்கள் சிறப்பான ஆட்டத்தை வெளிப்படுத்தினர். கண்டிப்பாக நாளை நடைபெறவுள்ள டி20 இறுதிப்போட்டியிலும் வெற்றி பெறுவார்கள்” என்று தெரிவித்தார்.
தொடர்ந்து பேசிய அவர், “இந்தியாவில் தற்போது உள்ள அணியின் வீரர்கள் தேர்வு முறை மிகவும் சிறந்ததாக உள்ளது. இளம் வீரர்களுக்கு வாய்ப்புகள் வழங்கப்படுகிறது. இளம் வீரர்களில் ஹர்திக் பாண்டியாவும், மணிஷ் பாண்டேவும் திறமையாக விளையாடுகின்றனர். அவர்கள் இந்திய அணியில் சேவாக் மற்றும் ஹர்பஜன் சிங் இடத்தை பிடிப்பார்கள். தோனி தலைமையிலான அணி இதற்குமுன் டி20 மற்றும் ஒருநாள் போட்டி உலகக் கோப்பையை வென்றுள்ளது. அந்த வெற்றி மிகவும் கடினமானது. தோனி திறமையான தலைமை 2019ஆம் ஆண்டு உலக கோப்பையிலும் அது வெளிப்படும்” என்று கூறினார்.