2019 ஆம் ஆண்டு இங்கிலாந்தில் நடைபெறவுள்ள கிரிக்கெட் உலகக்கோப்பை போட்டிக்கு, எட்டாவது அணியாக இலங்கை தகுதி பெற்றுள்ளது.
இங்கிலாந்துக்கு எதிராக மேன்செஸ்டரில் நடைபெற்ற முதல் ஒருநாள் போட்டியில் வெஸ்ட் இண்டீஸ் தோல்வி அடைந்ததால், நேரடியாக உலகக்கோப்பைக்கு தகுதி பெறும் வாய்ப்பை இலங்கை அணி பெற்றுள்ளது. தரவரிசையில் தற்போது ஒன்பதாவது இடத்தில் உள்ள வெஸ்ட் இண்டீஸ் அணி, உலகக்கோப்பையில் பங்கேற்க இனி ஆப்கானிஸ்தான், ஜிம்பாப்வே, அயர்லாந்து ஆகிய அணிகளுடன் தகுதிச் சுற்றில் விளையாட வேண்டும். இந்த தகுதிச்சுற்றில் முதல் 2 இடங்களைப் பிடிக்கும் அணிகள், உலகக்கோப்பை தொடரில் விளையாட தேர்வு செய்யப்பட உள்ளது.
உலகத் தரவரிசையில் முதல் எட்டு இடங்களில் உள்ள இந்தியா, ஆஸ்திரேலியா, தென்னாப்ரிக்கா, பாகிஸ்தான், பங்களாதேஷ் உள்ளிட்ட அணிகள் ஏற்கனவே உலகக்கோப்பை போட்டிக்கு தகுதி பெற்றுள்ளன. இந்நிலையில் இலங்கையும் நேரடியாக உலகக்கோப்பையில் விளையாட தகுதி பெற்றுள்ளது.