இலங்கைக்கு சுற்றுப்பயணம் செய்துள்ள நியூசிலாந்து அணி 2 டி20 போட்டிகள் மற்றும் 3 ஒருநாள் போட்டிகள் கொண்ட தொடரில் பங்கேற்று விளையாடிவருகிறது.
முதலில் தொடங்கப்பட்ட 2 போட்டிகள் கொண்ட டி20 தொடரில் முதல் போட்டியில் இலங்கையும், இரண்டாவது போட்டியில் நியூசிலாந்தும் வெற்றிபெற்றதால் தொடர் 1-1 என சமன்செய்யப்பட்டது.
இந்நிலையில் ஒருநாள் தொடருக்கான முதல் போட்டி இலங்கையில் உள்ள தம்புளா மைதானத்தில் நடந்துவருகிறது. முதலில் பேட்டிங் செய்திருக்கும் இலங்கை அணி அவிஷ்க பெர்னாண்டோ மற்றும் குசால் மெண்டீஸ் இருவரின் அசத்தலான சதத்தால் 324 ரன்கள் குவித்துள்ளது.
முதலில் பேட்டிங் செய்த இலங்கை அணியில் தொடக்கவீரர் பதும் நிஷாங்கா 12 ரன்னில் வெளியேற, 2வது விக்கெட்டுக்கு கைக்கோர்த்த அவிஷ்க பெர்னாண்டோ மற்றும் குசால் மெண்டீஸ் இருவரும் அபாரமான பேட்டிங்கை வெளிப்படுத்தி அடுத்தடுத்து சதமடித்து அசத்தினர்.
9 பவுண்டரிகள் 2 சிக்சர்களுடன் 100 ரன்கள் அடித்தபோது பெர்னாண்டோ வெளியேற 206 ரன்கள் பார்ட்னர்ஷிப்பானது முடிவுக்கு வந்தது. நியூசிலாந்துக்கு எதிராக ஒரு விக்கெட்டுக்கு இலங்கை அணியின் மிகப்பெரிய பார்ட்னர்ஷிப்பாக இது அமைந்தது.
அதனைத்தொடர்ந்து அதிரடியாக விளையாடிய குசால் மெண்டீஸ் 17 பவுண்டரிகள் 2 சிக்சர்கள் என விளாசி 143 ரன்கள் இருந்தபோது அவுட்டாகி வெளியேறினார். அதற்கு அடுத்துவந்த வீரர்களும் அதிரடியாக விளையாட 5 விக்கெட்டுகள் இழப்புக்கு 324 ரன்கள் குவித்துள்ளது இலங்கை அணி. 49.2வது ஓவரின் போது மழை குறுக்கிட்டதால் மீதமுள்ள 4 பந்துகள் வீசப்படாமல் போட்டி நிறுத்தப்பட்டுள்ளது.
நியூசிலாந்து அணிக்கு எதிரான ஒரே போட்டியில் இரண்டு இலங்கை வீரர்கள் சதமடிப்பது 23 ஆண்டுகளுக்குபிறகு இதுவே முதல்முறை.
இதற்கு முன் 2001-ம் ஆண்டு ஷார்ஜாவில் நடந்த நியூசிலாந்துக்கு எதிரான போட்டியில் ஜெயசூர்யா (107) மற்றும் ஜெயவர்த்தனே (116) இருவரும் சதமடித்திருந்தனர்.