“நான் அப்பவே சொன்னேன்... கோலியை சீண்டாதீர்கள் என்று...” - அமிதாப் பச்சன்

விராட் கோலியை சீண்டாதீர்கள் என வெஸ்ட் இண்டீஸ் பந்து வீச்சாளர்களுக்கு பாலிவுட் நடிகர் அமிதாப் பச்சன் எச்சரிக்கை விடுத்துள்ளார். 

இந்தியா-வெஸ்ட் இண்டீஸ் இடையேயான முதல் டி20 போட்டி நேற்று நடைபெற்றது. இந்தப் போட்டியில் இந்திய அணி 6 விக்கெட் வித்தியாசத்தில் வெற்றிப் பெற்றது. இப்போட்டியில் சிறப்பாக விளையாடிய கேப்டன் விராட் கோலி 50 பந்துகளில் 94 ரன்கள் எடுத்தார். இந்தப் போட்டியின்போது வெஸ்ட் இண்டீஸ் வீரர் வில்லியம்ஸை விராட் கோலி ‘நோட்புக்’ கொண்டாட்டத்தின் மூலம் கலாய்த்தார். இந்த வீடியோ சமூக வலைத்தளங்களில் வைரலானது. 

இந்நிலையில் இந்த விவகாரம் தொடர்பாக பாலிவுட் நடிகர் அமிதாப் பச்சன் தனது ட்விட்டர் பக்கத்தில் பதிவிட்டுள்ளார். அதில், “விராட் கோலியை சீண்டாதீர்கள் என்று எத்தனையோ முறை நான் கூறியிருக்கிறேன். ஆனால் நீங்கள் கேட்கவில்லை. தற்போது அதன் விளைவாக அவருடைய அசாத்திய ஆட்டத்தை பார்க்க முடிந்தது. வெஸ்ட் இண்டீஸ் பந்துவீச்சாளர்கள் முகங்களை பார்த்தாலே அவர்களை கோலி எவ்வாறு சிதறடித்திருக்கிறார் என்பது தெரிகிறது” எனப் பதிவிட்டுள்ளார். 

இதற்கு இந்திய கேப்டன் விராட் கோலி தனது ட்விட்டர் பக்கத்தில் பதிலளித்துள்ளார். அதில், “உங்களுடைய வசனம் எனக்கு மிகவும் பிடித்துள்ளது. நீங்கள் எப்போதுமே எனக்கு ஒரு முன் உதாரணம்” எனத் தெரிவித்துள்ளார்.