தீப ஒளித் திருநாளை முன்னிட்டு மக்களுக்கு ஆளுநர் மற்றும் அரசியல்கட்சி தலைவர்கள் வாழ்த்து தெரிவித்துள்ளனர்.
தமிழ்நாடு ஆளுநர் ஆர்.என்.ரவி வெளியிட்டுள்ள வாழ்த்துச் செய்தியில், ”தீபாவளி நாளில் அன்னை லட்சுமி நம் இதயங்களை அளவற்ற அன்பு மற்றும் ஆழ்ந்த இரக்கத்தால் ஒளிரச் செய்து, அனைவருக்கும் மிகுந்த மகிழ்ச்சி, நல்ல ஆரோக்கியம், செழிப்பு, சமுதாயத்தில் ஒற்றுமை மற்றும் ஒருமைப்பாட்டை வளர்த்து அருள்புரிவார்.”என கூறியுள்ளார்.
அதிமுக பொதுச் செயலாளர் எடப்பாடி பழனிசாமி வெளியிட்டுள்ள வாழ்த்துச் செய்தியில், ”மக்கள் அனைவரது வாழ்விலும் துன்பங்கள் நீங்கி, இன்பங்கள் பெருகட்டும்.” என வாழ்த்து தெரிவித்துள்ளார்.
”தீபாவளித் திருநாளில் வகுப்புவாத நச்சு சக்திகள் வீழ்த்தப்பட வேண்டும் என்பதில் உறுதியாக இருக்கும் வகையில் தீபாவளி பண்டிகையை கொண்டாடுவோம்.” என தமிழ்நாடு காங்கிரஸ் கமிட்டி தலைவர் செல்வபெருந்தகை வாழ்த்து தெரிவித்துள்ளார்.
மத்திய இணை அமைச்சர் எல்.முருகன் வெளியிட்டுள்ள வாழ்த்துச் செய்தியில், ”அனைவரும் நல்ல உடல்நலத்தோடு வாழவும், வாழ்வில் துன்பம் விலகி, இன்பம் பெருகவும் செல்வம் செழித்து எல்லோரது இல்லத்திலும் உள்ளத்திலும் மகிழ்ச்சி பெருகவும் வாழ்த்துக்கள்.” என கூறியுள்ளார்.
பாஜக மூத்த தலைவர் தமிழிசை சவுந்தரராஜன் வெளியிட்டுள்ள வாழ்த்துச் செய்தியில், ”அனைவரது வாழ்விலும் ஒளிமயமான எதிர்காலத்தையும், மகிழ்ச்சியையும் இந்த தீபாவளித் திருநாள் கொண்டுவர வாழ்த்துகிறேன்.” தெரிவித்துள்ளார்.
"தீபத் திருநாளில் இறைவனின் அருளால் ஆணவம், அகங்காரம், இரக்கமின்மை, சினம் ஆகியவை அகன்று, தர்மம், ஈகை, மனிதநேயம், செய்நன்றி அறிதல் ஆகியவை தழைத்தோங்கட்டும்."என முன்னாள் முதலமைச்சர் ஓபிஎஸ் வாழ்த்து தெரிவித்துள்ளார்.
தமிழக வெற்றிக் கழகத் தலைவர் விஜய், ”தீப ஒளித் திருநாளில், தீபங்களின் ஒளி வெள்ளத்தில் காரிருள் விலகி, நல் விடியல் பிறக்கட்டும் . அனைவரது இல்லங்களிலும் உள்ளங்களிலும் அன்பு, அமைதி, செல்வம் நிலைத்து நீடித்திருக்கட்டும் .”எனவும் விஜய் வாழ்த்து தெரிவித்துள்ளார்.
"சமூகநீதி, அமைதி, வளம், வளர்ச்சி, ஒற்றுமை, நல்லிணக்கம், சகோதரத்துவம், பன்முகத்தன்மை உள்ளிட்டவை ஜொலிக்கவும், மக்களின் வாழ்வில் இல்லாமை என்பதே இல்லாததாகி மகிழ்ச்சி மட்டுமே நிறைந்திருக்க தீப ஒளி வகை செய்யட்டும்.” பாமக நிறுவனர் ராமதாஸ் வாழ்த்து தெரிவித்துள்ளார்.
அமமுக பொதுச் செயலாளர் டிடிவி தினகரன் வெளியிட்டுள்ள வாழ்த்துச் செய்தியில், "தர்மத்தின் வாழ்வுதனை சூது கவ்வும், தர்மம் மறுபடியும் வெல்லும் என்ற நீதியை உணர்த்தும் தீபாவளி திருநாளில் மக்களை சூழ்ந்திருக்கும் தீயசக்திகள் விலகி அனைவரது வாழ்விலும் வளமும், நலமும் பெருகட்டும்." என கூறியுள்ளார்.
தமிழ்மாநில காங்கிரஸ் தலைவர் ஜி.கே. வாசன் வெளியிட்டுள்ள வாழ்த்துச் செய்தியில், ”தீய எண்ணங்கள் மறைய, நல்லெண்ணம் மேலோங்க தீபாவளி வழிகாட்டட்டும்.”என தெரிவித்துள்ளார்.
”மக்களிடையே அன்பு, நட்பு, நல்லிணக்கம், சகோதரத்துவம் மலர வேண்டும்.” என பாமக தலைவர் அன்புமணி ராமதாஸ் வெளியிட்டுள்ள வாழ்த்துச் செய்தியில் கூறியுள்ளார்.
”இல்லமெங்கும் மகிழ்ச்சி, உள்ளமெங்கும் மலர்ச்சி என தீப ஒளிநாளில் அனைவர் மனதிலும் உற்சாகம் நிறைய வாழ்த்துகிறேன்.” மக்கள் நீதி மய்யம் கட்சித் தலைவர் கமல்ஹாசன் தெரிவித்துள்ளார்.
”நாடெங்கும் அன்பும், அமைதியும் தழைக்கட்டும், வேற்றுமை அகன்று ஒற்றுமை ஓங்கட்டும், அனைவரது வாழ்விலும் வளமும், நலமும் பெருகட்டும் என ஆண்டவனை வேண்டுகிறேன்.”வி.கே. சசிகலா தெரிவித்துள்ளார்.