''உலகிற்கு ஜனநாயகத்தின் பாடத்தை பீகார் கற்பித்திருக்கிறது'' - பிரதமர் மோடி

பீகார் தேர்தல் முடிவுகள் உலகிற்கு ஜனநாயகத்தின் பாடத்தை கற்பித்திருக்கிறது. ஜனநாயகம் எவ்வாறு வலுப்பெறுகிறது என்பதை பீகார் உலகுக்கு தெரிவித்துள்ளது என்று பிரதமர் நரேந்திர மோடி ட்வீட் செய்துள்ளார்

பீகாரில் பாஜக கூட்டணியின் வெற்றி குறித்து ட்வீட் செய்துள்ள பிரதமர் மோடி "பீகார் ஜனநாயகத்தின் பாடத்தை உலகுக்குக் கற்றுக் கொடுத்தது. ஜனநாயகம் எவ்வாறு வலுப்பெறுகிறது என்பதை இன்று பீகார் மீண்டும் உலகுக்குக் கூறியுள்ளது. சாதனை படைக்கும் வகையில் ஏழை, தாழ்த்தப்பட்ட மற்றும் பீகார் பெண்களும் வாக்களித்து இன்று வளர்ச்சிக்கான தீர்க்கமான முடிவையும் அளித்துள்ளனர்" என்று பிரதமர் மோடி இந்தியில் ட்வீட் செய்துள்ளார்.

"கிராமங்களில் உள்ள ஏழைகள், விவசாயிகள், தொழிலாளர்கள், வணிகர்கள், கடைக்காரர்கள் மற்றும் பீகாரின் ஒவ்வொரு பகுதியும் தேசிய ஜனநாயக கூட்டணியின் வளர்ச்சி என்ற மந்திரத்தை நம்பியுள்ளன. ஒவ்வொரு நபரின் சீரான வளர்ச்சிக்காகவும், பீகாரின் ஒவ்வொரு குடிமகனுக்கும் நான் மீண்டும் உறுதியளிக்கிறேன். ஒவ்வொரு பிராந்தியத்திலும், நாங்கள் முழு அர்ப்பணிப்புடன் தொடர்ந்து பணியாற்றுவோம்”என கூறியுள்ளார்

மேலும் "பீகாரில் உள்ள இளைஞர்களுக்கான தன்னிறைவு பெற்ற புதிய தசாப்தம் இருக்கும். பீகார் இளைஞர்கள் தங்கள் வலிமை மற்றும் தேசிய ஜனநாயக கூட்டணியின் உறுதியை நம்பியுள்ளனர். இந்த இளமை ஆற்றல் இப்போது தேசிய ஜனநாயக கூட்டணியை ஊக்குவித்துள்ளது, நாம் முன்பை விட கடினமாக உழைக்க வேண்டும். வளர்ச்சிக்கான முன்னுரிமை மட்டுமே பீகாரில் உள்ள ஒவ்வொரு வாக்காளரின் ஆசை என்று இந்த தேர்தலில் தெளிவாகக் கூறியுள்ளனர் ”என்றும் கூறியுள்ளார்.

பீகார் தேர்தலில் ராஷ்டிரிய ஜனதா தளம் 75 இடங்களையும், பாஜக 74 இடங்களையும் வென்றது. ஜனதா தளம் யுனைடெட் 43 இடங்களையும், காங்கிரஸ் 19 இடங்களையும், சிபிஐ-எம்எல் 11 இடங்களிலும் வெற்றி பெற்றுள்ளன. லோக் ஜனசக்தி கட்சி ஒரு இடத்தை மட்டுமே வென்றது.