ஹைதராபாத்தை சேர்ந்த பெண் அமெரிக்காவில் தன்னுடைய வீட்டில் உயிரிழந்துள்ளார்.
ஹைதராபாத்தைச் சேர்ந்த பெண் கஜம் வனிதா(38). இவர் தன்னுடைய கணவர் ரசகொண்டா சிவக்குமார்(40) உடன் அமெரிக்காவின் வடக்கு கரோலினாவில் உள்ள வீட்டில் வசித்து வந்தார். சிவக்குமார் சாஃப்ட்வேர் இஞ்ஜினியராக பணி புரிந்து வருகிறார்.
இந்நிலையில், அமெரிக்காவில் உள்ள தன்னுடைய வீட்டில் அவர் சந்தேகத்திற்கிடமான வகையில் உயிரிழந்தார். வனிதா உயிரிழந்தது குறித்த தகவல் உறவினர்கள் மூலமாக அவரது பெற்றோர்களுக்கு வந்துள்ளது. இதனையடுத்து, தன்னுடைய மகளின் மரணம் குறித்து காவல்நிலையத்தில் புகார் ஒன்றினை அவரது தந்தை அளித்தார். அந்தப் புகாரில், “தன்னுடைய மகள் கடந்த ஜூன் மாதம் தான் அமெரிக்காவிற்கு கணவருடன் சென்றார். அவருக்கு இரண்டு குழந்தைகள் இருக்கின்றன. அமெரிக்கா சென்றது முதல் அவர் எங்களை தொடர்பு கொண்டு பேசவில்லை.
தன்னுடைய மகள் அவரது கணவர் மற்றும் மாமனார், மாமியாரின் கொடுமை தாங்க முடியாமல் தற்கொலை செய்து கொண்டிருக்கலாம். வனிதாவின் உடலை அமெரிக்காவில் இருந்து இந்தியாவிற்கு கொண்டு வர நடவடிக்கை எடுக்க வேண்டும். உடல் இங்கு வந்தபிறகு தான் எங்களால் எதனையும் உறுதியாக சொல்ல முடியும்” என வலியுறுத்தியுள்ளார். இதனிடையே, வனிதாவின் மரணம் தொடர்பாக அவரது கணவர் சிவக்குமாரிடம் காவலில் வைத்து அமெரிக்க போலீசார் விசாரணை மேற்கொண்டு வருகின்றனர்.