வயநாட்டில் நிலச்சரிவு ஏற்பட்ட பகுதியில் அரசுத் துறைக்கு இணையாக தன்னார்வலர்களும் தங்களால் முடிந்த உதவிகளை செய்து வருகின்றனர். இதே போல திரைப்பிரபலங்களும் பண உதவி மற்றும் பொருளதவி அளித்து வயநாடு மக்களின் மேம்பாட்டிற்காக அனைத்து விதத்திலும் கைகோத்துள்ளனர். அந்த வகையில், மலையாள நடிகை மற்றும் நடிகர்கள் களத்தில் இருக்கும் மக்களுக்கு உதவி செய்து வருகின்றனர்.
நடிகை நிகிலா விமல், இந்திய ஜனநாயக வாலிபர் சங்கத்துடன் இணைந்து பாதிக்கப்பட்டவர்களுக்குத் தேவையான நிவாரண பொருட்களை கொடுப்பதற்கு உதவி செய்து வருகிறார். உன்னி முகுந்தன், மஞ்சு வாரியர், நவ்யா நாயர், ஷேன் நிகாம் ஆகியோரும் மீட்பு பணிகளை மேற்கொள்வதற்கும், களத்தில் இறங்கி உதவிகளை செய்வதற்கும் குழுவாக இறங்கி செயல்பட அழைப்பு விடுத்துள்ளனர்.
அதுமட்டுமல்லாமல், முன்னணி நடிகர்களான மம்மூட்டி, மோகன்லால், பிரித்திவிராஜ், ஃபகத் ஃபாசில் உள்ளிட்டோர் தங்களது ரசிகர் அமைப்பு மூலம் பல்வேறு உதவிகளை செய்து வருகின்றனர்.
இவை தவிர தமிழ், தெலுங்கு திரையுலகினரும் வயநாடு மக்களுக்காக உதவி செய்து வருகின்றனர். பேரிடரால் பாதித்த மக்களுக்கு அனைவரும் இயன்ற உதவியை செய்யுமாறு நடிகர் சூரி தனது சமூக வலைத்தளம் மூலமாக வலியுறுத்தியுள்ளார். விக்ரம், கார்த்தி, சூர்யா, ஜோதிகா, அல்லு அர்ஜூன், நயன்தாரா, இயக்குநர் விக்னேஷ் சிவன், நடிகை ராஷ்மிகா மந்தனா உள்ளிட்ட ஏராளமானோர் வயநாடு மீண்டு வருவதற்காக கேரள அரசிடம் நிதியுதவி அளித்துள்ளனர்.