சென்னையில் மாநகர பேருந்து ஓட்டுநரை தாக்கிய பள்ளி மாணவர்களை கைது செய்யக்கோரி பேருந்துகளை சாலையில் நிறுத்தி பேருந்து ஊழியர்கள் போரட்டத்தில் ஈடுபட்டனர்.
சென்னை கிண்டி சின்னமலையில் உள்ள மாநகராட்சி பள்ளியில் படிக்கும் சில மாணவர்கள் வழித்தடம் 3 தி.நகர் முதல் திருவான்மியூர் வரை செல்லும் மாநகர பேருந்தில் ஏறி படியில் தொங்கியவாறு பயணம் செய்துள்ளனர். அவர்களை மேலே ஏறும்படி மாநகர பேருந்து ஓட்டுநர் ஏழுமலை என்பவர் பலமுறை சொல்லியும் மாணவர்கள் அதனை கண்டு கொள்ளவில்லை என்றும், ஒரு கட்டத்தில் ஒரு மாணவர் படியில் இருந்து விழுந்ததாகவும் கூறப்படுகிறது. இதனால் ஆத்திரமடைந்த சக மாணவர்கள் மாநகர பேருந்து ஓட்டுநர்களை ஆபாசமாக பேசி கண்மூடித்தனமாக தாக்கியுள்ளனர்.
இதனையடுத்து மாநகர பேருந்துகளை சாலையில் நிறுத்திவிட்டு பேருந்து ஓட்டுநர் மற்றும் நடத்துநர்கள் போராட்டத்தில் ஈடுபட்டனர். போலீசார் மாணவர்களை கைது செய்வதாக அளித்த உத்தரவாதத்தின் பேரில் அனைவரும் கலைந்து சென்று கிண்டி காவல் நிலையத்தில் புகார் அளித்தனர். புகாரின் பேரில் கிண்டி போலீசார் மாணவர்களை தேடி வருகின்றனர்.