புத்தாண்டு தினமான ஜனவரி 1 ஆம் தேதி விஸ்வாசம் படத்தின் டீசர் வெளியாக வாய்ப்புள்ளதாக தகவல்கள் வெளியாகியுள்ளன
நடிகர் அஜித்தை வைத்து இயக்குநர் சிவா ‘வீரம்’,‘வேதாளம்’,‘விவேகம்’ உள்ளிட்ட படங்களை இயக்கினார். அவர் அஜித்துடன் 4-வது முறையாக கூட்டணி சேர்ந்த திரைப்படம் ‘விஸ்வாசம்’. 4 வது முறையும் கூட்டணி சேர்ந்ததால் அதிக எதிர்பார்ப்பு உருவாகியுள்ளது. இந்தப் படம் வரும் பொங்கலுக்கு வெளியாக உள்ளது. இந்நிலையில் ‘விஸ்வாசம்’ படத்தின் மோஷன் போஸ்டரை நவம்பர் 27 ஆம் தேதி படக்குழுவினர் வெளியிட்டனர். அதன் பின்னர் படத்தின் மீதான எதிர்பார்ப்பு அதிகரித்தது.
இந்நிலையில் சமீபத்தில் பாடல்கள் வெளியாகி அனைத்து தரப்பு ரசிகர்களின் வரவேற்பையும் பெற்றுள்ளது. இதற்கிடையே ஜனவரி 10 ஆம் தேதி ரிலீஸ் ஆக உள்ள இந்தப் படத்தை பல்வேறு நாடுகளில் வெளியிடும் முயற்சியில் தயாரிப்பாளர்கள் ஈடுபட்டுள்ளனர்.
அதன்படி முதன்முறையாக அஜீத் படம் ரஷ்யாவில் வெளியாகிறது. அங்கு, ரஜினியின் ’கபாலி’, ’2.0’, விஜய்யின் ’சர்கார்’ படங்கள் ஏற்கெனவே ரிலீஸ் ஆகியுள்ளன. இந்நிலையில் ’2.0’ படத்தை ரஷ்யாவில் வெளியிட்ட பிரசாந்த், ’விஸ்வாசம்’ படத்தை ரஷ்யாவிலும் உக்ரைனிலும் வெளியிடுகிறார்.
ரிலீஸ் தொடர்பான வேலைகள் பரபரப்பாக நடந்து வரும் நிலையில் படத்தின் டீசர் எப்போது வெளியாகும் என ரசிகர்கள் காத்திருக்கின்றனர். இந்நிலையில் புத்தாண்டு தினமான ஜனவரி 1ம் தேதி படத்தின் டீசர் வெளியாக வாய்ப்புள்ளதாக தகவல்கள் வெளியாகியுள்ளன. தணிக்கைக்குச் சென்ற விஸ்வாசம் திரைப்படம் எந்த வித கத்தரிப்பும் இன்றி யு சான்றிதழ் வாங்கியிருப்பது குறிப்பிடத்தக்கது.