இயக்குநர் ராஜ்குமார் பெரியசாமி இயக்கத்தில் சிவகார்த்திகேயன் மற்றும் சாய்பல்லவி இருவரின் அசாத்தலான நடிப்பில் வெளிவந்திருக்கும் திரைப்படம் ‘அமரன்’.
2014-ம் ஆண்டு ஜம்மு-காஷ்மீரில் உள்ள 44-வது ராஷ்ட்ரிய ரைபிள்ஸ் பட்டாலியனில் பணிபுரியும் போது, ஷோபியானில் நடந்த காசிபத்ரி ஆபரேஷனில் முக்கியப் பங்கு வகித்து உயிர்நீத்த மேஜர் முகுந்த் வரதராஜனின் வாழ்க்கையை மையமாகக் கொண்டு இப்படம் இயக்கப்பட்டு வெளியானது.
அக்டோபர் 31ம் தேதி வெளியான அமரன் திரைப்படம் 18வது நாளை கடந்து திரையரங்கில் அனைவரும் விரும்பி பார்க்கும் திரைப்படமாக இருந்துவருகிறது.
காஷ்மீர் மக்களின் வாழ்வியலை தவறாக காட்டியுள்ளனர் என்ற பல்வேறு விமர்சனங்கள் இருந்தாலும் மேஜர் முகுந்த் வரதராஜன் வாழ்க்கை முறை, ரானுவத்திற்காக அவருடைய அர்ப்பணிப்பு மற்றும் மனைவி இந்து ரெபேக்கா வர்கீஸ் உடனான காதல் வாழ்க்கை அதில் அவர்கள் எதிர்கொண்ட சிக்கல்கள் என பல முகங்களை வெளிப்படுத்தியிருக்கும் அமரன் படமானது அனைவரையும் திரையரங்கிற்கு இழுத்து வருகிறது.
உண்மை கதாபாத்திரங்களை ஏற்று நடித்திருக்கும் சிவகார்த்திகேயன் மற்றும் சாய் பல்லவி இருவரின் நடிப்பும் அதிகப்படியான பாராட்டை பெற்றுவரும் நிலையில், படத்தின் வசூல் 18வது நாள் முடிவில் உலகளவில் ரூ.295 கோடியை எட்டியிருப்பதாக தகவல் வெளியாகியுள்ளது.
அமரன் படத்தின் வசூலை பொறுத்தவரையில் sacnilk.com படி, 18வது நாள் முடிவில் இந்தியாவில் மட்டும் ரூ.218.25 கோடி வசூலை ஈட்டியுள்ளதாக கூறப்பட்டுள்ளது. வெளிநாட்டு கலக்சன் ரூ.76.75 கோடியாக இருக்கும் பட்சத்தில் உலகளாவிய பாக்ஸ் ஆபிஸ் கலக்சனாக அமரன் ரூ.295 கோடி வசூலை ஈட்டியுள்ளது.
இதன் அடிப்படையில் ரூ.285 மற்றும் ரூ.290 கோடி வசூலை ஈட்டி பிளாக் பஸ்டர் திரைப்படங்களாக இருக்கும் விஜயின் பிகில் மற்றும் ரஜினியின் எந்திரன் திரைப்பட வசூலை அமரன் திரைப்படம் முறியடித்துள்ளது.
sacnilk.com படி ரூ.290 கோடி வசூலை ஈட்டியிருக்கிறது என புள்ளிவிவரங்கள் அடிப்படையில் சொல்லப்பட்டாலும், பல தகவல்கள் அமரன் திரைப்படம் ரூ.300 கோடி என்ற மைல்கல்லை கடந்துவிட்டதாக கூறுகின்றன.
இன்னும் திரையரங்கில் அமரன் திரைப்படத்திற்கு ஈர்ப்பு குறையாத நிலையில் நாளையே ரூ.300 கோடி வசூலை அமரன் கடந்துவிட்டதாக அதிகாரப்பூர்வ அறிவிப்பு வருவதற்கும் வாய்ப்பு இருக்கிறது.
சிவகார்த்திகேயன் நடிப்பில் உருவாகியிருக்கும் அமரன் ரூ.300 கோடி என்ற மைல்கல்லை எட்டும்பட்சத்தில், இளம் வயதில் ரூ.300 கோடி வசூல் கொடுத்த முதல் தமிழ்நடிகர் என்ற சாதனையை சிவகார்த்திகேயன் படைப்பார் என எதிர்ப்பார்க்கப்படுகிறது.