ராம்பிரசாத்
தமிழ் சினிமாவில் நடிகர் சிவகார்த்திகேயன் வளர்ந்து வருகின்ற, அதே நேரத்தில் கவனிக்கத்தகுந்த நடிகராக உள்ளார். இவரது படங்கள் ரிலீஸ் ஆகின்றது என்றாலே தியேட்டருக்கு குடும்பத்தோடு ரசிகர்கள் வருவர். இதுவரை இவரது படங்களில் கோரமான சண்டை காட்சிகளோ, ஆபாச காட்சிகளோ இருந்ததில்லை.
மக்களின் ஆதரவை அதிகம் பெற்றுள்ளதால் சிவகார்த்திகேயன் தமிழ் சினிமா பாக்ஸ் ஆஃபீஸில் வசூல் மன்னனாக மாறியுள்ளார். வெறும் நடிகராக மட்டுமில்லாமல், சிவகார்த்திகேயன் தனக்குள் ஒரு நல்ல பிசினஸ் மேன் சிந்தனையைக் கொண்டிருக்கிறார் என்றே கூறலாம்.
டாப் நடிகர்கள் படங்கள் வெளியாகும்போது தனது படத்தை வெளியிடாமல், அதற்கு அடுத்த கட்டத்தில் இருக்கக்கூடிய நடிகர்களின் படங்களோடு தனது படங்களை வெளியீட்டு வசூலில் வெற்றி பெற்றவராக மாறிவிடுகிறார்.
தனது படம் தனியே வெளியாகும்போது என்னதான் வசூல் செய்தாலும், மற்றொரு ஸ்டார் நடிகருடன் படத்தினை வெளியிட்டு அதிக வசூல் செய்து பாக்ஸ் ஆஃபீஸில் வெற்றி என்பதை சைலண்ட்டாக பதிவு செய்து வருவதுடன், தனது மார்க்கெட்டையும் நாளுக்கு நாள் உயர்த்தி வருகிறார்.
தீபாவளியை முன்னிட்டு ஜெயம் ரவியின் 'பிரதர்' படத்துடன், அமரன் படத்தை வெளியிட்டுள்ளார். பிரதர் படத்திற்கு போதுமான புரோமோஷன் செய்யாததால், படக்குழுவினருக்கே படத்தின் மீது பெரிய அளவிற்கு நம்பிக்கை இல்லை என திரைத்துறையினர் பேசத் தொடங்கிவிட்டனர்.
இப்படி இருக்கும்போது அமரன் படத்திற்கு நல்ல விமர்சனங்களே வருவதால், வசூல் ரீதியாக வெற்றிப் படமாக மாறும் என்ற பேச்சுகள் இப்போதே தொடங்கிவிட்டன.