பல வருடங்களுக்கு பிறகு கமல்ஹாசன் மற்றும் மணிரத்னம் கூட்டணியில் உருவாகியிருக்கும் திரைப்படம் ’தக் லைஃப் (Thug Life)’. இத்திரைப்படத்தில் நடிகர்கள் கமல்ஹாசன், நாசர், சிலம்பரசன், ஜோஜூ ஜார்ஜ், அசோக் செல்வன், ஐஸ்வர்யா லட்சுமி என பல்வேறு திரை நட்சத்திரங்கள் நடித்துள்ளதால் படத்தின் மீதான எதிர்பார்ப்பு அதிகரித்துள்ளது. படத்திற்கு ஏ.ஆர்.ரஹ்மான் இசை அமைத்துள்ளார்.
கேங்ஸ்டர் பின்னணியில் உருவாக்கப்பட்டிருக்கும் தக் லைஃப் திரைப்படம் சென்னை, டெல்லி, ரஷ்யா, பாண்டிச்சேரி உள்ளிட்ட பல பகுதிகளில் காட்சிப்படுத்தப்பட்ட நிலையில், சில நாள்களுக்கு முன் முழுமையாகப் படப்பிடிப்பு நிறைவடைந்தது.
இந்நிலையில் தக் லைஃப் (Thug Life) திரைப்படமானது அடுத்தாண்டு ஏப்ரல் மாதம் திரைக்கு வர உள்ளதாக கூறப்பட்ட நிலையில், தற்போது படத்தின் ரிலீஸ் தேதியை டீசர் உடன் வெளியிட்டு அறிவித்துள்ளது படக்குழு.
நம்பவர் 7-ம் தேதியான இன்று நடிகர் கமல்ஹாசன் பிறந்தநாளை கொண்டாடும் நிலையில், அதனை கொண்டாடும் விதமாக இன்று காலை 11 மணிக்கு தக் லைஃப் படத்தின் டீசர் வெளியிடப்படும் என்று படக்குழு நேற்று அறிவித்திருந்தது.
அதன்படி இன்று தக் லைஃப் படத்தின் ரிலீஸ் தேதி டீசருடன் அறிவிக்கப்பட்டுள்ளது. டீசரில் கமல் மற்றும் சிம்பு இடம்பெற்றிருக்கும் காட்சிகள் தீயாக இருக்கின்றன. உலகநாயகன் கமல்ஹாசன் பல வேடங்களில் ஸ்கீரினை ஆக்கிரமிக்கிறார். டீசர் முடியும்போது ‘விண்வெளி நாயகா’ என்ற பாடல் வரிகளுடன் முடிகிறது.
மணிரத்னம் மற்றும் கமல்ஹாசன் கூட்டணியில் உருவாகியிருக்கும் ’தக் லைஃப் (Thug Life)’ திரைப்படம் அடுத்தாண்டு ஜுன் மாதம் 5-ம் தேதி திரையரங்கில் வெளியாகவிருப்பதாக அதிகாரப்பூர்வமாக அறிவிக்கப்பட்டுள்ளது.