நடிகர் கமல்ஹாசன் விஸ்வரூபம்-2 படப்பிடிப்புக்கு திரும்பியுள்ளார்.
கமல்ஹாசன், ஆண்ட்ரியா, பூஜா குமார், ராகுல் போஸ் உள்ளிட்ட பலர் நடித்த படம், விஸ்வரூபம். இந்தப் படம் ஹிட்டானதை அடுத்து அதன் இரண்டாம் பாகத்தை கமல்ஹாசன் உருவாக்கியுள்ளார். இந்தப் படத்திலும் ராகுல் போஸ், பூஜா குமார், ஆண்ட்ரியா, சேகர் கபூர் உள்ளிட்ட பலர் நடித்திருக்கிறார்கள். இதனை ஆஸ்கர் ரவிச்சந்திரன் தயாரித்து வருகிறார்கள். இந்த படத்தை கமல்ஹாசனே வெளியிட இருக்கிறார்.
படத்தின் 95 சதவிகித காட்சிகள் முடிவடைந்துவிட்டன. சில காட்சிகள் மட்டுமே இன்னும் மீதமுள்ளது. இதன் ஃப்ஸ்ட் லுக் போஸ்டர் கடந்த மே மாதம் வெளியானது.
இதனிடையே அரசியல் பிரவேசம் தொடர்பாக கமல் பல்வேறு முக்கிய அறிவிப்புகளை வெளியிட்டு வருகிறார். அரசியல் கட்சி துவங்குவதை கிட்டத்தட்ட உறுதி செய்துவிட்டார். பிறந்தநாளன்று ரசிகர்களை சந்தித்து ஆலோசனை செய்தார். தொடர்ந்து பல்வேறு நிகழ்வுகள் குறித்து கருத்து தெரிவித்து வருகிறார்.
இந்நிலையில், கமல்ஹாசன் விஸ்வரூபம்-2 படப்பிடிப்புக்கு திரும்பியுள்ளதாக தகவல்கள் வெளியாகியுள்ளது. பாடல் ஒன்றிற்கான காட்சிகள் சென்னையில் படமாக்கப்பட்டு வருகிறது. விஸ்வரூபம்2 படம் குடியரசு தினத்திற்கு வெளியாகும் என்று எதிர்பார்க்கப்படுகிறது. அதேபோல் விஸ்வரூபம்2 படத்தின் ட்ரெய்லர் அடுத்தமாதம் வெளியாகும் என்று தெரிகிறது.