‘அடி பூங்குயிலே.. பூங்குயிலே கேளு’பாடல் மூலம் பரவலாக அறியப்பட்டவர் அரண்மனைக்கிளி காயத்ரி. அவர் மீண்டும் நடிக்க இருக்கிறார்.
ராஜ்கிரன் நடிப்பில் பெரும் வெற்றி அடைந்தப் படம் அரண்மனைக்கிளி. இந்தப் படத்தில் ஹீரோயினாக நடித்தவர் காயத்ரி. இந்தியில் குழந்தை நட்சத்திரமாக நடித்து வந்தவர். பிறகு ராஜ்கிரண் மூலம் தமிழ் சினிமாவில் அறிமுகமானார். அதற்கு முன்பே ‘செம்பருத்தி’ படத்தில் இவரை ஹீரோயினாக போட்டு சில நாள்கள் ஷூட்டிங் போனது. ஆனால் வேறு சில காரணங்களால் அப்படத்தில் காயத்ரி நடிக்கவில்லை. அரண்மனைக் கிளி வெற்றிக்குப் பின் ‘எஜமான்’ படத்தில் இவர் ஹீரோயினாக நடிக்க தேர்வு செய்யப்பட்டு இருந்தார். மொழிப் பிரச்னையால் அந்தப் படத்தில் நடிக்காமல் விலகிக் கொண்டார் காயத்ரி. மும்பைவாசியான இவர் காதல் திருமணத்திற்குப் பிறகு சென்னையிலேயே தங்கிவிட்டார். குடும்பம், பிசினஸ் என்று இல்லற வாழ்க்கையில் கவனம் செலுத்தி வந்த காயத்ரி இப்பொழுது மீண்டும் நடிக்க முடிவெடுத்திருக்கிறார். இந்த திடீர் முடிவுக்கு என்ன காரணம் என புதிய தலைமுறை இணையதளத்திற்கு பிரத்யேகமாக பேட்டி அளித்திருக்கிறார்.
தனது ரீஎன்ட்ரி குறித்து அவர் பேசுகையில், “எனக்கு நடிக்க வேண்டும் என்ற விருப்பமே இல்லை. எங்க வீட்டில் குழந்தைகள் அதிகம். அவர்கள் என் பழைய படங்களை யுடியூப்பில் போட்டு பார்த்தார்கள். என் நடிப்பு அவர்களுக்கு பிடித்திருந்தது. திரும்ப ஏன் நீங்க நடிக்க கூடாது? எனக் கேள்வி கேட்டார்கள். கட்டாயம் நடித்தே ஆக வேண்டும். எங்களுக்காக உங்க திறமையை நீங்கள் வீணடித்து இருக்கக் கூடாது என வருத்தப்பட்டார்கள். குழந்தைகள் விரும்பத்திற்காக மீண்டும் நடிக்க முடிவெடுத்திருக்கிறேன்” என்கிறார் காயத்ரி. இவரது நிஜப் பெயர் சந்தோஷ். ஆண் பிள்ளை பெயராக இருக்கிறதே எனக் கேட்டால், “ஆம். எங்கள் வீட்டில் அதிக பெண் பிள்ளைகள். ஆகவே அம்மா ஆண் பிள்ளை இல்லாத குறையைப் போக்க எனக்கு இந்தப் பெயரை வைத்தார்” என்றார் காயத்ரி.