தேசிய விருதுபெற்ற நடிகர் விஜய் சேதுபதிக்கு ‘தி ஃபேமிலி மேன்’ மனோஜ் பாஜ்பாயி வாழ்த்துகள் தெரிவித்திருக்கிறார்.
ஒவ்வொரு ஆண்டும் திரைத்துறையில் சிறப்பான பங்களிப்பை வழங்கும் கலைஞர்கள் மத்திய அரசால் விருது வழங்கி அங்கீகரிக்கப்பட்டு வருகின்றனர். அந்தவகையில், 2019-ஆம் ஆண்டுக்கான விருதுகள் கடந்த மார்ச் மாதம் அறிவிக்கப்பட்ட நிலையில், கொரோனா காரணமாக தள்ளிவைக்கப்பட்ட விருது வழங்கும் விழா அக்டோபர் 25 ஆம் தேதி நடைபெற்றது.
அதில், நடிகர் விஜய் சேதுபதிக்கு சிறந்த துணை நடிகருக்கான விருது ’சூப்பர் டீலக்ஸ்’ திரைப்படத்தில் ‘ஷில்பா’ என்ற திருநங்கை கதாபாத்திரத்தில் நடித்ததற்காக கிடைத்தது. விஜய் சேதுபதிக்கு பல தரப்பினரும் வாழ்த்து தெரிவித்துவரும் நிலையில், ‘தி ஃபேமிலிமேன்’ வெப் சீரிஸ் மூலம் கவனம் ஈர்த்த நடிகர் மனோஜ் பாஜ்பாயி தனது ட்விட்டர் பக்கத்தில்,
“எனது அன்பான மற்றும் மிகவும் திறமையான நண்பர் விஜய் சேதுபதியை தேசிய விருது விழாவில் சந்தித்தேன். சூப்பர் டீலக்ஸில் சிறப்பான நடிப்பிற்காக சிறந்த துணை நடிகருக்கான விருதைப் பெற்றதற்கு வாழ்த்துகள்” என்று உற்சாகமுடன் தெரிவித்திருக்கிறார். 'தி ஃபேமிலி மேன்' வெப் சீரிஸ் இயக்குநர்கள் ராஜ் மற்றும் டிகே, அமேசான் பிரைம் தளத்திற்கு இயக்கும் புதிய வெப் சீரிஸில் நடிகர் விஜய் சேதுபதி முக்கிய கதாபாத்திரத்தில் நடிக்கிறார் என்பது குறிப்பிடத்தக்கது.