சி.வி.குமார் இயக்கத்தில் உருவாகியுள்ள ‘மாயவன்’ திரைப்படம் வரும் 14ம் தேதி வெளியாக உள்ளதாக படக்குழு அறிவித்துள்ளது.
அட்டகத்தி, பீட்சா, சூதுகவ்வும், தெகிடி, முண்டாசுப்பட்டி, இன்று நேற்று நாளை என பல வெற்றிப்படங்களை தயாரித்தவர் சி.வி.குமார். இவரது ‘திருக்குமரன் எண்டர்டெயின்மெண்ட்’ நிறுவனத்தின் மூலம் வெளியான பல படங்கள் தமிழ் சினிமாவில் தனித்த அடையாளங்களை ஏற்படுத்தின. ஏறக்குறைய வெற்றித் தயாரிப்பாளர் என இவரை ஒவ்வொரு மேடையிலும் பல திரை நட்சத்திரங்கள் புகழ்ந்துள்ளனர்.
இவர் முதன்முறையாக ‘மாயவன்’ படத்தின் மூலம் இயக்குநராக அறிமுகமாகிறார். சி.வி.குமார் கதை எழுதி, இயக்கி, தயாரித்துள்ள இப்படத்திற்கு ‘சூதுகவ்வும்’ இயக்குநர் நலன் குமாரசாமி திரைக்கதை, வசனம் எழுதியுள்ளார். இதில் ஹீரோவாக சந்தீப் கிஷன் நடித்துள்ளார். நாயகியாக லாவண்யா திரிபாதி நடித்துள்ளார். மேலும் ஜாக்கி செராஃப், டேனியல் பாலாஜி, ஜெயப்பிரகாஷ், பகவதி பெருமாள், மைம் கோபி ஆகியோர் முக்கிய கதாபாத்திரங்களில் நடித்துள்ளனர். ஜிப்ரான் இசையமைத்துள்ளார். கோபி அமர்நாத் ஒளிப்பதிவு செய்திருக்கிறார். லியோ ஜான் பால் படத்தொகுப்பு செய்துள்ளார்.
படத்தை வருகிற டிசம்பர் 14-ஆம் தேதி ரிலீஸ் செய்ய இருப்பதாக சி.வி.குமார் தனது ட்விட்டர் பக்கத்தில் தெரிவித்திருக்கிறார். மேலும் உங்களின் ஆதரவை நல்குங்கள் என அவர் வேண்டுகோள் விடுத்துள்ளார்.