ஹர்ஷினி மூவிஸ் தயாரிக்கும் பாஸ்கர் ஒரு ராஸ்கல் படத்தின் இசை வெளியீட்டு விழா சென்னையில் நடைபெற்றது.
அரவிந்த் சாமி, அமலா பால் இணைந்து நடிக்கும் பாஸ்கர் ஒரு ராஸ்கல் படத்தை இயக்குனர் சித்திக் இயக்குகிறார். மலையாளத்தில் மாபெரும் வெற்றி பெற்ற பாஸ்கர் தி ரஸ்கல் படத்தின் ரீமேக்காக இந்தப் படம் உருவாகி உள்ளது. இப்படத்திற்கு அம்ரேஷ் கணேஷ் இசையமைத்துள்ளார். படத்தின் இசை வெளியீட்டு விழா சென்னையில் இன்று நடைபெற்றது.
விழாவில் நடிகர் அர்விந்த் சாமி, அமலா பால், இயக்குனர் சித்திக், ரோபோ சங்கர், ஆஃப்தாப்ஷிவ்தசானி, நடிகை மீனா மற்றும் இசையமைப்பாளர் அம்ரேஷூடன் தாயார் ஜெயச்சித்ரா உள்ளிட்ட திரைபிரபலங்கள் பலரும் கலந்து கொண்டனர். விழாவில் நடிகர் அர்விந்த் சாமி, "இந்தப் படத்திற்காக என்னை தேர்வு செய்ததற்கு இயக்குனர் சித்திக்கிற்கு எனது நன்றிகளை தெரிவித்துக் கொள்கிறேன் இந்தப் படத்தின் ஆக்ஷன் காட்சிகளுக்காக நிறைய ரிஸ்க்குகளை எடுத்துள்ளேன். ஸ்டண்ட் மாஸ்டர் விஜயனுக்கு இது 500 ஆவது படம். அதில் நான் நடித்துள்ளது எனக்கு பெருமையாக இருக்கிறது. படத்தில் ரோபோ மற்றும் சூரியின் காமெடி காட்சிகள் அருமையாக வந்துள்ளது. அவர்களுடன் நானும் சேர்ந்து கொஞ்சம் காமெடிக்கு முயற்சி செய்துள்ளேன்." என்று கூறினார்.
ஜெயச் சித்ரா," எனது மகன் அம்ரேஷ், மூன்றாவது முறையாக இந்தப் பெருமைமிக்க மேடையில் நிற்க செய்துள்ளான். மொட்ட சிவா கெட்ட சிவா படத்தில் இவனது இசை அனைவராலும் பாரட்டப்பட்டது. தற்போது இந்த மேடையில் இருந்த பிரபலங்கள் பலரும் அவரை பாராட்டினார்கள். அதை கேட்கும்போது பெருமையாக உள்ளது. இந்தப் படம் வெற்றியடைய எனது வாழ்த்துகள்" என்று கூறினார்.