மலையாள ஹீரோவை கத்தியால் குத்த ஓடி வந்த முதியவரை ரயில்வே போலீசார் கைது செய்தனர்.
பிரபல மலையாள ஹீரோ குஞ்சாக்கோ போபன். இவர் இப்போது லால் ஜோஸ் இயக்கும் ’தட்டிபுரத்து அச்சுதன்’ என்ற படத்தில் இப்போது நடித்துவருகிறார். இந்த படத்தின் ஷூட்டிங்கிற்கு செல்வதற்காக கடந்த வெள்ளிக்கிழமை இரவு எர்ணாகுளம் தெற்கு ரயில்வே ஸ்டேஷன் வந்தார். கண்ணூர் செல்லும் மாவேலி ரயிலுக்காகக் காத்திருந்தார். அப்போது முதியவர் ஒருவர் கத்தியை காட்டி, திட்டிக்கொண்டே குஞ்சாக்கோ போபனை நோக்கி ஓடி வந்தார். குத்தப் போவதாக மிரட்டினார்.
இதையடுத்து அந்தப் பகுதி பரபரப்பானது. அருகில் இருந்த ரயில்வே போலீஸார் அந்த முதியவரை பிடித்து விசாரித்தனர். அவர் தொப்பும்படியை சேர்ந்த ஸ்டேன்லி ஜோசப் (வயது 76) என்பது தெரிய வந்தது. கஞ்சாக்கோ கொடுத்த புகாரையடுத்து அவரை போலீசார் கைது செய்தனர்.
‘அவருக்கு குஞ்சாக்கோ யார் என்பது தெரியவில்லை. எதற்காக அவரை குத்தச் சென்றார் என்பது பற்றி விசாரித்து வருகிறோம்’ என்று போலீசார் தெரிவித்தனர்.