இலங்கையில் கடலில் தத்தளித்துக் கொண்டிருந்த காட்டு யானையை நீண்ட போராட்டத்திற்குப் பிறகு அந்நாட்டு கடற்படையினர் பத்திரமாக மீட்டனர்.
இலங்கையின் கொக்கிளாய் கடற்பகுதியில் கடற்படையினர் வழக்கமான ரோந்து பணியில் ஈடுபட்டுக்கொண்டிருந்த போது யானை ஒன்று கடலில் தத்தளித்துக் கொண்டிருப்பதை கண்டனர். இதுகுறித்து அவர்கள் உடனடியாக வனத்துறையினருக்கு தகவல் தெரிவித்ததோடு யானையை மீட்கும் முயற்சியையும் மேற்கொண்டனர்.
கிட்டத்தட்ட சுமார் 6 மணி நேர கடுமையான போராட்டத்திற்குப் பிறகு வனத்துறை உதவியுடன் கடலில் தத்தளித்த யானை பத்திரமாக மீட்கப்பட்டது. மீட்கப்பட்ட யானை ஆரோக்கியத்துடன் இருப்பதாக வனத்துறையினர் தெரிவித்துள்ளனர்.
