பரிசோதனை முயற்சியின் போது நோயாளிக்கு ஏற்பட்ட பக்க விளைவுகள் காரணமாக நிறுத்தப்பட்ட ஆக்ஸ்போர்டு பல்கலைக்கழகம் உருவாக்கிய கோவிட் -19 தடுப்பூசியின் சோதனைகள் மீண்டும் தொடங்கியுள்ளது.
இது தொடர்பாக ஆக்ஸ்போர்டு பல்கலைக்கழகம் வெளியிட்டுள்ள செய்திக்குறிப்பில் “ஆக்ஸ்போர்டு கொரோனா வைரஸ் தடுப்பூசி ChAdOx1 nCoV-19 இன் மருத்துவ பரிசோதனைகள் அனைத்தும் இங்கிலாந்து மருத்துவ சோதனை தளங்களில் மீண்டும் தொடங்கும்.
இந்த சோதனையின் ஒரு பகுதியாக உலகளவில் சுமார் 18,000 நபர்கள் ஆய்வு தடுப்பூசி செலுத்தப்பட்டு பரிசோதனையில் உள்ளனர். இது போன்ற பெரிய சோதனைகளில், சில பங்கேற்பாளர்கள் உடல்நிலை சரியில்லாமல் போவார்கள் என்று எதிர்பார்க்கப்படுகிறது, மேலும் இது தொடர்பான ஒவ்வொரு வழக்கையும் கவனமாக மதிப்பீடு செய்ய வேண்டும்.
ஞாயிற்றுக்கிழமை (06/09/2020) ஒரு சுயாதீன பாதுகாப்பு மறுஆய்வுக் குழு தடுப்பூசியின் பாதுகாப்புத் தரவை மறுஆய்வு செய்ய அனுமதிக்க எங்கள் உலகளாவிய சோதனைகள் அனைத்தையும் இடைநிறுத்தக் கோரியது. ஆனால் இந்த காலகட்டத்திலும்கூட அனைத்து வழக்கமான பின்தொடர்தல் சந்திப்புகளும் இயல்பாகவே தொடர்ந்தன.
இப்போது சுயாதீன மறுஆய்வு செயல்முறை முடிவடைந்துள்ளது மற்றும் சுயாதீன பாதுகாப்பு மறுஆய்வுக் குழு மற்றும் இங்கிலாந்து கட்டுப்பாட்டாளர் எம்.எச்.ஆர்.ஏ ஆகிய இருவரின் பரிந்துரைகளைப் பின்பற்றி, இங்கிலாந்தில் சோதனைகள் மீண்டும் தொடங்கும்." என்று அறிவித்துள்ளது
இந்த குறிப்பில் பாதிக்கப்பட்ட நோயாளியைப் பற்றிய விவரங்கள் அல்லது பக்க விளைவின் தன்மைப்பற்றி எதுவும் குறிப்பிடப்படவில்லை. அமெரிக்க அதிபர் டொனால்ட் டிரம்ப் இன்னும் சில மாதங்களில் ஒரு தடுப்பூசி தயாராக வேண்டும் என்று வலியுறுத்தினாலும், ஆக்ஸ்போர்டு பல்கலைக்கழகம் 2022 க்கு முன்னர் ஒரு தடுப்பூசி தயாராக இருக்க வாய்ப்பில்லை என்று கூறியுள்ளது.
