சீனாவில் ஆடைக்குள் மறைத்து 102 ஐபோன்களைக் கடத்த முயன்ற இளம் பெண்ணை சுங்கத்துறை அதிகாரிகள் கைது செய்தனர்.
ஹாங்காங்கிலிருந்து சீனாவுக்கு ஐபோன்களை சட்டவிரோதமாகக் கடத்த முயன்ற அந்த பெண்ணை சென்சென் விமானநிலைய அதிகாரிகள் கைது செய்தனர். மேலும், அவரிடமிருந்து விலை உயர்ந்த 7 கைக்கடிகாரங்களும் பறிமுதல் செய்யப்பட்டதாக சீன அதிகாரிகள் தெரிவித்தனர். கோடைகாலத்தில் ஸ்வெட்டர் அணிந்து அந்த பெண் வந்ததால், சந்தேகமடைந்த அதிகாரிகள் சோதனையிட்டதில் ஐபோன்களைக் கடத்தி வந்ததைக் கண்டறிந்தனர். அவரிடமிருந்து கைப்பற்றப்பட்ட பொருட்களின் மொத்த எடை 9 கிலோ இருக்கும் என்றும் தெரிவிக்கப்பட்டுள்ளது. ஹாங்காங்கிலிருந்து சீனாவுக்கு ஐபோன்கள் சட்டவிரோதமாகக் கடத்தப்படுவது இது முதல்முறையல்ல. கடந்த 2015ல் 84 ஐபோன்களைச் சீனாவுக்குக் கடத்த முயன்ற நபர் கைது செய்யப்பட்டார்.
