கடும் நிதிச்சிக்கலில் தவித்து வரும் பாகிஸ்தான் மிக அதிக வட்டி கொடுத்து 100 கோடி டாலர்களை கடனாக திரட்டியுள்ளது.
வெளிநாடுகளில் இருந்து வாங்கிய கடனை திரும்பச் செலுத்துவதற்கு நெருக்கடி அதிகரித்துள்ள நிலையில் 7.95% என்ற முன் எப்போதும் இல்லாத அதிக வட்டிக்கு பாகிஸ்தான் அரசு புதிதாக கடன் திரட்டியுள்ளதாக அந்நாட்டு ஊடகங்கள் தெரிவித்துள்ளன. 7 ஆண்டுகளில் திரும்பச்செலுத்தத்தக்க வகையில் லாகூர் - இஸ்லாமாபாத் நெடுஞ்சாலையின் ஒரு பகுதியை பிணையாக வைத்து இக்கடன் பெறப்பட்டுள்ளதாக ஊடகங்கள் கூறியுள்ளன.
பாகிஸ்தானின் அன்னியச்செலாவணி பற்றாக்குறை கடுமையாக அதிகரித்துள்ள நிலையில் அதை தற்காலிகமாக சமாளிக்க இத்தொகை பெறப்பட்டுள்ளதாகவும் ஊடகங்கள் கூறியுள்ளன.
சவுதி அரேபியாவிடம் இருந்து ஒன்றரை மாதங்களுக்கு முன் 300 கோடி டாலர்களை கடனாக பெற்ற பாகிஸ்தான் அதில் 200 கோடி டாலர்களை செலவளித்துவிட்டது. தற்போது அன்னியச்செலாவணி நெருக்கடி அதிகரித்துள்ள நிலையில் அந்நாடு மீண்டும் கடன் வாங்கியுள்ளது
