கிம் ஜாங் உன் உடனான சந்திப்பு ரத்து செய்யப்பட்டதை அடுத்து வட கொரியா மீதான தடைகளை, அமெரிக்கா தொடர வேண்டும் என ஜப்பான் வலியுறுத்தியுள்ளது.
சிங்கப்பூரில் கிம் ஜாங் உன்-னை சந்தித்து பேச்சுவார்த்தை நடத்தப் போவதாக ட்விட்டரில் அமெரிக்க அதிபர் ட்ரம்ப் தெரிவித்திருந்தார். இதற்கிடையே ட்ரம்புடனான சந்திப்பை ரத்துச் செய்யப் போவதாக கிம் ஜாங் உன் கடந்த வாரம் தெரிவித்து வந்ததாக தகவல் வெளியாகின. இந்த நிலையில் சீன அதிபர் ஸீ ஜின் பிங்கை சந்தித்த பிறகே, கிம் ஜாங் உன் தனது நிலைப்பாட்டை மாற்றிக் கொண்டதாக குற்றம்சாட்டி வந்தது அமெரிக்கா. இதனால் இந்தச் சந்திப்பு நடக்குமா என்ற சந்தேகம் தொடர்ந்து நீடித்து வந்த நிலையில் இச்சந்திப்பு நேற்று ரத்து செய்யப்பட்டதாக அமெரிக்கா அறிவித்தது.
இந்நிலையில் டோக்கியோவில் செய்தியாளர்களை சந்தித்த ஜப்பான் தலைமைச் செயலாளர் யோஷிஹிடே சுகா, வடகொரியாவின் அணு ஆயுத திட்டங்களை முடக்குவதற்கு இந்தச் சந்திப்பு அவசியம் என்றாலும், அமெரிக்க அதிபர் ட்ரம்பின் முடிவை வரவேற்கிறோம் என தெரிவித்தார். அதே சமயம் வடகொரியா மீதான ஐ.நா.வின் தடைகளை தொடர வேண்டும் என தெரிவித்தார்.
