அண்மையில் பிறந்த தனது பெண் குழந்தைக்கு 'பெல்லா எஸ்மரால்டா' எனப் பெயர் சூட்டியிருக்கிறார் கிறிஸ்டியானோ ரொனால்டோ.
கால்பந்து உலகில் மிகப்பெரிய ஜாம்பவானாக விளங்கி வருபவர் மான்செஸ்டர் யுனைடெட் வீரர் கிறிஸ்டியானோ ரொனால்டோ. 37 வயதான அவருக்கு 6 குழந்தைகள் உள்ளனர். இதில் கடந்த ஏப்ரல் மாதம் 18-ஆம் தேதி அன்று அவரது மனைவி ஜார்ஜினாவுக்கு இரட்டைக் குழந்தைகள் பிறந்தன. ஒரு ஆண், ஒரு பெண் என பிறந்த அந்த இரட்டையர்களில் ஆண் குழந்தை பிரசவத்தின் போதே உயிரிழந்திருந்தது. அது குறித்த செய்தியையும் ரொனால்டோ பகிர்ந்திருந்தார். இதையடுத்து உலகம் முழுவதும் உள்ள அவரது ரசிகர்கள் ரொனால்டோ தம்பதியருக்கு ஆறுதல் தெரிவித்தனர்.
பிறந்த இரட்டை குழந்தைகளில் மகள் நலமாக இருப்பதாக ரொனால்டோ தெரிவித்திருந்தார். இந்நிலையில், பிறந்த தனது பெண் குழந்தைக்கு 'பெல்லா எஸ்மரால்டா' எனப் பெயர் சூட்டியிருக்கிறார் ரொனால்டோ. இதுதொடர்பாக அவரது மனைவி ஜார்ஜினா வெளியிட்ட இன்ஸ்டாகிராம் பதிவில் தனது மகளின் படத்தை பகிர்ந்து 'பெல்லா எஸ்மரால்டா' என்ற பெயரை பிறந்த தினத்துடன் குறிப்பிட்டுள்ளார்.
முன்னதாக அண்மையில் தனது மகளின் படத்தை முதல்முறையாக பகிர்ந்திருந்தார் ரொனால்டோ. அந்த புகைப்படத்தில் அவர் தனது மனைவி உள்பட குடும்பத்தினருடன் இருக்கிறார். "ஜார்ஜினாவும், மகளும் வீடு திரும்பியுள்ளனர். உங்கள் அன்பான வார்த்தைகளுக்கும், அரவணைப்புக்கும் நன்றி. உங்கள் ஆதரவு இந்நேரத்தில் எங்களுக்கு மிகவும் முக்கியமானதாகும்" என ரொனால்டோ நெகிழ்ச்சியுடன் ட்விட்டரில் பதிவிட்டிருந்தார்.
இதையும் படிக்கலாம்: மாட்ரிட் ஓபன்: நடாலை அடுத்து ஜோகோவிச்சை வீழ்த்தி இறுதிப்போட்டிக்குள் நுழைந்த இளம்வீரர்!
