ஜெயலலிதா மரணம் தொடர்பாக விசாரணை ஆணையம் அமைக்கப்படும் என்ற முதலமைச்சர் அறிவிப்பு வெறும் கண்துடைப்பு என திமுக மாநிலங்களவை உறுப்பினர் டி.கே.எஸ்.இளங்கோவன் தெரிவித்துள்ளார்.
ஜெயலலிதா மரணம் தொடர்பாக விசாரணை ஆணையம் அமைக்கப்படும் என்ற முதலமைச்சரின் அறிவிப்பு குறித்து புதிய தலைமுறையிடம் பேசிய திமுக மாநிலங்களவை உறுப்பினர் டி.கே.எஸ். இளங்கோவன், "பாரதிய ஜனதா கட்சியின் விருப்பப்படி சசிகலா குடும்பத்தை ஓரம்கட்ட விசாரணை ஆணையத்தை தமிழக அரசு அறிவித்துள்ளது. முதலமைச்சர் பழனிசாமியின் அறிவிப்பு பாஜக கொடுத்த அழுத்தத்தின் காரணமாக வெளியிடப்பட்டது. சசிகலா குடும்பத்தை அரசியலில் இருந்து அப்புறப்படுத்தும் முயற்சியாக இதைப் பார்க்க வேண்டும். ஜெயலலிதா மரணம் குறித்து விசாரணை ஆணையம் அமைக்க ஓ.பன்னீர்செல்வம் கோரிக்கை விடுத்தபோது தேவையில்லை என்று மறுத்தவர்கள் இன்று அரசை காப்பாற்றுவதற்காக இந்த நடவடிக்கையை மேற்கொண்டுள்ளனர். திமுகவை பொறுத்தவரை விசாரணை ஆணையம் அமைக்கப்படுவது என்பது வெறும் கந்துடைப்பே" என தெரிவித்தார்.
