நாடாளுமன்ற தேர்தலில் திமுக கூட்டணியில் இடம்பெற்றுள்ள மார்க்சிஸ்ட் கம்யூனிஸ்ட் கட்சி சார்பில் போட்டியிடும் வேட்பாளர்கள் அறிவிக்கப்பட்டுள்ளனர்.
திமுக தலைமையில் காங்கிரஸ் உள்ளிட்ட கூட்டணி கட்சிகள் போட்டியிடும் தொகுதிகளை திமுக இன்று அறிவித்துள்ளது. அதன்படி, கோவை மற்றும் மதுரை மக்களவை தொகுதிகளில் மார்க்சிஸ்ட் கம்யூனிஸ்ட் கட்சி போட்டியிடும் என்று திமுக தலைவர் ஸ்டாலின் அறிவித்தார். திருப்பூர், நாகை ஆகிய 2 தொகுதிகளில் இந்திய கம்யூனிஸ்ட் போட்டியிடுகிறது.
இந்நிலையில், மார்க்சிஸ்ட் கட்சி சார்பில் போட்டியிடும் இரண்டு வேட்பாளர்களை அக்கட்சியின் மாநில செயலாளர் கே.பாலகிருஷ்ணன் அறிவித்துள்ளார். அதன்படி, கோவையில் முன்னாள் எம்.பி பி.ஆர்.நடராஜன், மதுரையில் எழுத்தாளர் சு.வெங்கடேசன் ஆகியோர் போட்டியிடுவார்கள் என்று அவர் அறிவித்தார். எழுத்தாளர் சு.வெங்கடேசன் காவல் கோட்டம் என்ற நாவலுக்கு சாகித்ய அகாடமி விருதினை பெற்றவர்.
மதச்சார்பற்ற ஐக்கிய முற்போக்கு கூட்டணியை பொறுத்தவரை தமிழகத்தில் திமுக 20, காங்கிரஸ் 10, விடுதலை சிறுத்தைகள் 2, இந்திய கம்யூனிஸ்ட் 2, மார்க்சிஸ்ட் 2, மதிமுக 1, இந்திய யூனியன் முஸ்லிம் லீக் 1, கொங்கு நாடு மக்கள் தேசிய கட்சி 1, ஐஜேகே ஒரு தொகுதிகளில் போட்டியிடுகின்றனர்.
