நடந்துமுடிந்த நகர்ப்புற உள்ளாட்சித் தேர்தலில் கொங்கு மண்டலத்தை கைப்பற்றியுள்ளோம் என முதல்வர் பெருமிதம் தெரிவித்துள்ளார்.
நகர்ப்புற உள்ளாட்சித் தேர்தலில் திமுக அதிக வார்டுகளில் வெற்றிபெற்றுள்ள நிலையில், கொங்கு மண்டலத்தில் வெற்றிபெற்றது குறித்து முதல்வர் மு.க.ஸ்டாலின் பத்திரிகையாளர் சந்திப்பில் பகிர்ந்துள்ளார். அவர் பேசியபோது, கடந்த 9 மாத கால ஆட்சிக்கு மக்கள் வழங்கிய நற்சான்றிதழ்தான் இந்த வெற்றி. திராவிட மாடல் ஆட்சிக்கு மக்கள் அளித்துள்ள அங்கீகாரம்தான் இது. வெற்றியை கண்டு கர்வம் கொள்ளவில்லை, மக்கள் வைத்துள்ள நம்பிக்கையை காப்பாற்றுவோம். நகர்ப்புற உள்ளாட்சி தேர்தலில் திமுக கூட்டணிக்கு மாபெரும் வெற்றியை தந்த தமிழ்நாட்டு மக்களுக்கு நன்றி என்று கூறினார்.
தொடர்ந்து பேசிய அவர், நகர்ப்புற தேர்தலில் வெற்றி பெற்றுள்ள அனைவருக்கும் எனது வாழ்த்துக்கள் என வாழ்த்திய அவர், அதிமுகவின் கோட்டையான கொங்கு மண்டலத்தையே திமுக கைப்பற்றியுள்ளது எனவும், எந்தப்புகாரும் வராமல் பார்த்துக் கொள்ள வேண்டும், யாராக இருந்தாலும் நடவடிக்கை எடுக்கப்படும் எனவும் தெரிவித்துள்ளார்.
