செங்கல்பட்டு அதிமுக வேட்பாளரை மாற்றக்கோரி கொடியுடன் அதிமுகவினர் சாலை மறியலில் ஈடுபட்டதால் பரபரப்பு ஏற்பட்டது.
அதிமுக சார்பில் செங்கல்பட்டு சட்டப்பேரவைத் தொகுதி வேட்பாளராக காட்டாங்கொளத்தூர் வடக்கு ஒன்றிய செயலாளர் கஜா என்கிற கஜேந்திரன் வேட்பாளராக அறிவிக்கப்பட்டுள்ளார். இதற்கு எதிர்ப்பு தெரிவித்து அதிமுகவினர் கொடியுடன் சென்னை திருச்சி தேசிய நெடுஞ்சாலையில் சாலை மறியலில் ஈடுபட்டனர்.
இப்போராட்டத்தில் செங்கல்பட்டு மேற்கு ஒன்றிய செயலாளர் கௌஸ் பாஷாவின் ஆதரவாளர்கள் கலந்து கொண்டு அவருக்கு வாய்ப்பு அளிக்க வேண்டும் என போராட்டத்தில் ஈடுபட்டனர். கட்சியில் உழைத்தவருக்கு சீட் கொடுக்க வேண்டும், வெற்றி வாய்ப்பு அதிகம் உள்ள நபருக்கு சீட் கொடுக்க வேண்டும் உள்ளிட்ட கோஷங்களை போராட்டத்தின்போது அதிமுகவினர் எழுப்பினர்.
15 நிமிடத்திற்கு மேலாக நடைபெற்ற இந்த சாலை மறியல் போராட்டத்தினால் போக்குவரத்து கடுமையாக பாதிக்கப்பட்டது. இப்போராட்டத்தில் 100க்கும் மேற்பட்ட அதிமுகவினர் கலந்து கொண்டனர்.
