கமல்ஹாசனின் பிறந்தநாள் மற்றும் செயலி அறிமுக விழா வருகிற 5-ம் தேதி கேளம்பாக்கம், செட்டிநாடு மருத்துவமனை வளாகத்தில் நடைபெறவுள்ளதாக தகவல் வெளியாகியுள்ளது.
கமல்ஹாசன் தனது பிறந்த நாளான நவம்பர் 7ஆம் தேதி முக்கிய அறிவிப்பு ஒன்றினை வெளியிடவுள்ளதாக தெரிவித்து இருந்தார். முதலில் அரசியல் கட்சி தொடங்குவது குறித்த முக்கிய அறிவிப்பை வெளியிடுவார் என்று எதிர்ப்பர்க்கப்பட்டது. இந்த செய்தியை அவரே மறுத்துவிட்டார். பின்னர் வெளியான தகவலின்படி நவம்பர் 7ஆம் தேதி அன்று ஒரு புதிய செயலி ஒன்றினை தொடங்கவுள்ளதாகவும், அந்த செயலி மூலம் கமலின் நற்பணி இயக்கத்தினர்களும், பொதுமக்களும் இணைக்கப்படுவார்கள் என்று கூறப்பட்டது.
செயலி குறித்த அறிவிப்பு, அவரது பிறந்தநாளில் வெளியாகும் என சொல்லப்பட்ட நிலையில், தற்போது வரும் 5-ம் தேதி கேளம்பாக்கம் செட்டிநாடு மருத்துவமனை வளாகத்தில் உள்ள ஆடிட்டோரியத்தில் மதியம் 2 மணியளவில் அந்த விழாவானாது நடைபெறுவது உறுதி செய்யப்பட்டிருப்பதாக தகவல் வெளியாகியுள்ளது. இந்த விழாவில், கம்லஹாசன் பிறந்தநாளை முன்னிட்டு நலத்திட்ட உதவிகள், இலக்கிய நிகழ்வுகள் போன்றவையும் திட்டமிடப்பட்டுள்ளன. அதோடு, கமல்ஹாசன் அரசியல் வருகை குறித்த அறிவிப்புகளுக்கான வாய்ப்பும் உள்ளதாகக் கருதப்படுகிறது.
இந்த விழாவில், தமிழகம் மட்டுமின்றி ஆந்திரா, கர்நாடகா, கேரளா உள்ளிட்ட மாநிலங்களில் இருந்தும் நற்பணி இயக்க நிர்வாகிகள், ரசிகர்கள், மாணவர்கள் கலந்து கொள்கின்றனர். கமல்ஹாசன் பிறந்தநாள் விழா பல ஆண்டுகளாக நடைபெற்று வந்தாலும், அரசியல் பிரவேசம் குறித்த எதிர்பார்ப்புகள் அதிகரித்துள்ள சூழலில் வரும் 5-ம் தேதி நடைபெறும் விழா மிகவும் முக்கியத்துவம் வாய்ந்ததாக பார்க்கப்படுகிறது.
