ஹெ.எம்.டி. குளோபல் நிறுவனத்தின் நோக்கியா மொபைல்கள் மீண்டும் மொபைல் உலகை ஆள வருகிறது. அந்த வகையில் நோக்கியா 3, நோக்கியா 5 போன்ற ஸ்மார்ட்ஃபோன்களை அண்மையில் அறிமுகப்படுத்தியது.
இந்நிலையில் தற்போது முதன்முதலாக அறிமுகப்படுத்திய நோக்கியா 3310 மாடலை போன்று குட்டி மொபைலை அறிமுகப்படுத்தியுள்ளது. நோக்கியா 105 மற்றும் நோக்கியா 130 ஆகிய மொபைல்கள் இந்திய சந்தையில் விற்பனைக்கு களமிறங்கியுள்ளன.
நோக்கியா 105 மாடல் 1.8 இன்ச் டிஸ்பிளே, 15 மணிநேரம் பேட்டரி பேக்அப் ஆகிய சிறப்பம்சங்களை கொண்டுள்ளது. மேலும் நோக்கியா மொபைலின் புகழ்பெற்ற ஸ்னேக் கேம், டூடுல் ஜம்ப், க்ராஸி ரோடு போன்ற கேம்களும் இதில் உள்ளன. 500 மெசேஜ்கள் மற்றும் 2000 மொபைல் எண்களை ஸ்டோர் செய்து வைக்கும் திறனுடன் வடிவமைக்கப்பட்டுள்ளது. நீலம், வெள்ளை, கருப்பு ஆகிய மூன்று நிறங்களில் களமிறங்கும் இந்த மாடலில் எஃப்.எம், ரேடியோ போன்ற வசதிகளும் உள்ளது. ஒரு சிம் போடும் வசதி கொண்ட நோக்கியா 105 மொபைல் ரூ.999-க்கும் ஜூலை 19 ஆம் தேதி முதல் விற்பனைக்கு வரவுள்ளது. நோக்கியா 105 மாடலில் இரண்டு சிம் வசதி கொண்டது ரூ.1149-க்கும் விற்பனை செய்யப்படுகிறது.
நோக்கியா 130 மாடலும் 1.8 இன்ச் டிஸ்பிளே தரத்துடன் வடிவமைக்கப்பட்டுள்ளது. 32 ஜிபி வரை மெமரி கார்டு போடும் வசதி உண்டு. எஃப்.எம், ரேடியோ போன்ற வசதிகளுடன் கேமரா வசதியும் உள்ளது. இதன் விலை இன்னும் அறிவிக்கபடவில்லை.
