சென்னை அம்பத்தூரில் ஃபேஸ்புக் மூலம் மகளிடம் பழகி ஏமாற்றிய வாலிபரை தந்தை ஒருவர் அரிவாளால் வெட்டியுள்ள சம்பவம் அதிர்ச்சியை ஏற்படுத்தியுள்ளது.
சென்னை அம்பத்தூரில் சட்டக்கல்லூரியில் படித்து வந்தவர் மாணவி சத்யபிரியா. இவருக்கும் லாரன்ஸ் என்பவருக்கும் ஃபேஸ்புக் மூலம் பழக்கம் ஏற்பட்டுள்ளது. இந்தப் பழக்கம் நாளடைவில் காதலாக மாறி இருவரும் நெருங்கி பழகி வந்ததாக கூறப்படுகிறது. இதையடுத்து சத்யபிரியாவை திருமணம் செய்துகொள்ள லாரன்ஸ் மறுத்ததாக தெரிகிறது.
இதனால் ஆத்திரமடைந்த மாணவியின் தந்தை, காதலன் லாரன்ஸை அரிவாளால் சரமாரியாக வெட்டியுள்ளார். இதைப்பார்த்த அங்கிருந்தவர்கள் படுகாயமடைந்த லாரன்ஸை மீட்டு கே.எம்.சி மருத்துவமனையில் சிகிச்சைக்காக அனுமதித்தனர். தகவலறிந்து வந்த போலீசார், மாணவியின் தந்தையை கைது செய்து விசாரணை நடத்தி வருகின்றனர். விசாரணையில் ஃபேஸ்புக் மூலம் பழகி குடித்தனம் நடத்திவிட்டு மகளை ஏமாற்றியதாக அவர் புகார் தெரிவித்துள்ளார்.
