டெல்லியில் போராடும் விவசாயிகளுக்கு ஆதரவாக போக்குவரத்து தொழிலாளர்கள் பேருந்துகளை இயக்காமல் போராட்டத்தில் ஈடுபட்டனர். சென்னை உட்பட பல்வேறு நகரங்களில் இந்தப் போராட்டம் நடந்தது.
தஞ்சாவூர் நகர பணிமனையில் அதிகாலை சுமார் 2 மணி நேரம் பேருந்துகள் இயங்காமல் வாயில் முன்பு முற்றுகை செய்து ஆர்ப்பாட்டத்தில் ஈடுபட்டனர்.
போராடி வரும் தமிழக விவசாயிகளின் கோரிக்கையை நிறைவேற்ற வேண்டும் மற்றும் போக்குவரத்து தொழிலாளர்களின் நீண்ட நாள் கோரிக்கையான ஓய்வுபெற்ற போக்குவரத்து ஊழியர்களுக்கு முதல் தேதியே ஓய்வூதியம் வழங்க வேண்டும் உள்ளிட்ட கோரிக்கைகளை வலியுறுத்தி முழக்கங்கள் எழுப்பப்பட்டன. இதே போன்று விழுப்புரத்திலும் அரசு பேருந்து போக்குவரத்து தொழிலாளர்கள் பணிமனை முன்பு ஆர்ப்பாட்டத்தில் ஈடுபட்டனர். இதனால் பனிமனைகளிலிருந்து பேருந்துகள் சில மணி நேரம் தாமதமாகப் புறப்பட்டு சென்றன.
